O Consello d’Europa denuncia malos tractos en garcholas, CIEs y comisarías espanyolas

A institución demanda a Espanya una investigación sobre os metodos emplegaus en os interrogatorios y un "codigo de conducta" de minimos

Una d'as detencions d'o 25S (Foto: Eldiario.es)

Una d’as detencions d’o 25S (Foto: Eldiario.es)

O Comité Europeu t’a Prevención d’a Tortura y d’as penas u Tractos inhumans u rebaixants (CPT) denuncia a existencia de “alegacions creyibles y consistents” de malos tractos a personas detenidas en rechimen de incomunicación y reitera que “contina sin resolver-se” o problema d’os malos tractos que fa a Guardia Civil ta personas sospeitosas de delitos de terrorismo dimpués de qualques decadas avisando d’ista situación.

En o suyo informe sobre a zaguer visita que l’organismo d’o Consello d’Europa fació en 2011 ta qualques garcholas, comisarías y Centros d’Internamiento ta Foranos en Espanya, o CPT fa una serie de recomendacions y demandas t’o Gubierno espanyol ta rematar con os tractos inhumants u rebaixants.

En iste sentiu, demanda una investigación “rigurosa y independient” sobre os metodos emplegaus en os interrogatorios, ya que considera que “se fan, a soben, a o marguin d’a normativa vichent”. Antimás, insta a Espanya a establir un “codigo de conducta” t’os interrogatorios a on que “s’habría de viedar de traza expresa vendar os uellos u meter capuchas t’as personas que sigan baixo custodia policial” asinas como ixamplar as gravacions t’as salas a on que se fan y celdas como una “guarancia eficaz frent a los malos tractos”.

Tamién recomienda que os chueces u fiscals prengan nota por escrito d’as denuncias por malos tractos y reclama que en dengún d’os casos estudiaus por a institución se prenioron midas ta investigar a coacción u malos tractos denunciaus.

En a suya respuesta, o Gubierno espanyol obvia la denuncia de “alegacions creyibles y consistents” de malos tractos que fa o CPT y nomás i repasa a lechislación vichent, que vieda y castiga la tortura. Tamién refusa de fer una investigación “rigurosa y independient” porque considera que ya la fa la Chusticia y estima que a creyación d’un organo de propio “resultaría dificilment compatible no nomás con a propia misión d’os organos chudicials, sino que tamién podría afectar t’a propia capacidat y operatividat d’os achents.”

Remera que os CIE no han d’estar garcholas.

O Comité Antitortura tamién denuncia malos tractos y comentarios racistas en os Centros d’Internamiento de Foranos (CIE, por as siglas en castellano) y demanda que se revisen as condicions en istos puestos ta asegurar que “respondan a un ambient menos restrictivo”, porque “no habrían de funcionar como garcholas”, remera o texto.

O Gubierno espanyol explica que os “elementos de contención pasiva (por eixemplo, as cletas) tienen como fin empachar as prebatinas de fuyir que miran de privar a repatriación. Antimás, s’esfiende con una criminalización cheneralizada d’os inmigrants enzarraus: “No cal ixublidar que un porcentache prou gran d’internos tien antecedents policials u vien de Centros Penitenciarios, lo que fa que as midas ta empachar que fuigan sigan as que calen. Antimás en bellas ocasions, si l’interno que fui tien antecedents delictivos ixo puya a periglosidat d’a fuga y chenera mas risques”, expresa l’Estau espanyol.

Entre as recomendacions que fa l’organismo cuanto a los CIE se i troban l’amillora d’os rechimens de visitas t’os internos, d’as condicions d’hichiene que s’ufre a los inmigrants, asinas como de l’asistencia sanitaria y a formación d’o personal que atiende istos centros.

Demanda identificacions visibles d’os policias.

L’informe charra prou d’o desaloix, o 27 de mayo de 2011, de l’acampada d’o movimiento 15M en a Plaza de Catalunya. A institución europea denuncia o “abuso de fuerza” de man d’a policía en ixa operación. Cuanto a lo suyo analís d’os feitos, o CPT insiste en o suyo intrés por a investigación prometida por o conseller d’Interior y comparte con o Esfensor d’o Pueblo en Catalunya la demanda de que los Mossos d’Escuadra porten “en cada inte y de traza vistera tarchetas d’identificación quan son de servicio”.

 

Fuent: http://www.eldiario.es/politica/Consejo-Europa-CIE-comisarias-espanolas_0_127387261.html

Una rispuesta a O Consello d’Europa denuncia malos tractos en garcholas, CIEs y comisarías espanyolas

  1. Pingback: Anónimo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.