O Consello d’Europa dubda d’a necesidat d’as “restriccions” d’a lei de Seguridat Ciudadana

O comisario europeu de dreitos humanos tacha de "altament problematico" o prochecto d'Interior

Nils Muiznieks. Foto: Saiema (CC-BY-SA)

Nils Muiznieks. Foto: Saiema (CC-BY-SA)

O Consello d’Europa considera que o esbruixallo d’a lei de Seguridat Ciudadana presentau por o Gubierno espanyol ye “altament problematico“. Asinas l’ha manifestau o comisario europeu de dreitos humanos, Nils Muiznieks, que dubda d’a necesidat d’as “restriccions” planteyadas por o Ministerio d’Interior “en una sociedat democratica“.

En una sesión informativa celebrada en Bruselas, Muiznieks ha planteyau a qüestión de dica qué punto son claros os termins legals de cara a la interpretación chudicial y o suyo conoiximiento por parte d’os ciudadanos, y, antiparte, a de “si calen istas restriccions en una sociedat democratica” ta mantener l’orden publico “sin interferir masiau en a libertat de reunión”.

Si va mas luen tractaré o tema con as autoridatz espanyolas“, ha clarificau o mandatario europeu, que ignora o proposito de l’Executivo de Mariano Rajoy en incrementar as sancions: “Quiero que belún me convenza que una pinyora de 600.000 euros por manifestar-se debant d’as institucions gubernamentals sin autorización ye equilibrada”, ha declarau o comisario, seguntes replega El País.

O comisario ha amostrau a suya preocupación por os castigos d’a protesta social que planteya o Gubierno. O Consello d’Europa ha criticau en bellas ocasions a represión en as manifestacions exercida por os Cuerpos y Fuerzas de Seguridat d’o Estau. O zaguer informe d’ista  institución criticaba o “emplego excesivo d’a fuerza, incluindo os disparos de pilotas de goma“, por parte d’a policía en as manifestacions contra os retalles y insistiba en a “freqüent falta d’indentificación d’os achents en ista mena de protestas, que ha impediu a persecución y sanción de qui ha perpetrau abusos.

Atro d’os organismos integrants d’o Consello, o Comité t’a Prevención d’a Tortura tamién carranyaba a Espanya por “l’abuso de fuerza”. En concreto se referiba a o desaloixo de l’acampada d’o movimiento 15M en a Plaza de Catalunya en Barcelona o 27 de mayo de 2011.

Interior diz que “no puede pasar por mas filtros”

O comisario ha asegurau que seguirá o proceso parlamentario d’aprebación d’a nueva regulación. Por a suya parte, o ministro Jorge Fernández Díaz ha explicau a qui “tienen bella dubda d’a churidicidat” de l’Antiprochecto de Lei de Seguridat Ciudadana que iste “no puede pasar por mas filtros d’organos institucionals d’os que va a pasar”. “Va a pasar por o filtro y o dictamen d’o Consello d’Estau, d’o Consello Cheneral d’o Poder Chudicial (CGPJ), d’o Consello Fiscal, y de l’Achencia Espanyola de Protección de Datos“, ha adhibiu.

“No puede pasar por mas filtros d’os que va a pasar, precisament porque somos conscients que, quan charramos d’a libertat y d’a seguridat, charramos de dreitos fundamentals y libertatz publicas, y por ixo hemos d’estar muit conscients que somos tocando un ambito muit sensible”, ha subrayau.

Fuent: http://www.eldiario.es/politica/Consejo-Europa-restricciones-Seguridad-Ciudadana_0_203330376.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.