O Consello escolar fa un dictamen contrario a la lei de no-luengas d’o gubierno

Encara que no ye vinculant a consellera Serrat si que dició que asperaban o dictamen antis de presentar o texto en as Cortz

Como anunciemos ahiere en Twitter, o Consello Escolar d’Aragón ha refusau a lei de no luengas presentada por o gubierno. L’aprebación d’o Consello Escolar yera un d’os trangos que o gubierno dició que amenistaba la lei, y yera, de feito, a unica consulta que quereba fer sobre o texto antis de presentar-lo en as Cortz. A votación d’o Consello estio de 18 votos contra o texto y 15 a favor.

A custión principal que ha levau a iste organismo a refusar a lei ha estau o nombre d’as luengas, que en o texto proposau por o gubierno no s’anomenan y que deixan en cosa cualsiquier atra consideración normativa. Encara que o dictamen d’o Consello no ye vinculant, a consellera dició en a presentación del texto que asperaba o dictamen d’o Consello Escolar ta presentar o texto en as Cortz. Agora, o gubierno habrá u bien renunciar a o dictamen y presentar o texto tal qual asinas, u por contra, modificar o texto, a lo menos, en o relativo a o nombre d’as luengas, aragonés y catalán que o gubierno amagaba con eufemismos cheograficos.

19 Rispuestas a O Consello escolar fa un dictamen contrario a la lei de no-luengas d’o gubierno

  1. No me foi muitas illusions, pero per lo menos que tiengan que comer-se con trunfas ixo de “modalidad lingüística aragonesa oriental”.

  2. Dabi Lahiguera

    En tiempos de crisi ye de dificil trobar a racionalidat, a lo menos quedan cados an que s’acubillan as verdatz scientificas.
    A lo menos publicament una institucion les ha fotiu un samugazo en toda la barra.

  3. aragonés fiero

    Estrania noticia. Muito estrania. A consellera debeba de saber d’antes que o consello podeba refusar-la, asinas que no se ta que se mulló con ixo de que le daría muitisma importancia a o suyo dictamen. ¿Una error táctica de a consellera? Lo dudo prou.

    ¿Puestar una estratechia “personal” de a Consellera ta fer una lei de luengas menos anti-aragonesa que la que yera la primera proposa d’este nuevo proyecto? Seguntes tiengo entendiu esta muller ye menos hooligan anti-luengas d’Aragón que no altros de o suyo partiu.

    ¿Puestar una estratechia t’apolargar o debate sine die y que ni sisquiera se’n faiga brenca nian por as modalidatz dialectals aplicando-les a eutanasia pasiva? (como deciba Severino Pallaruelo)

    Sería d’agradaxer que si bi ha beluno que saba a intrahistoria de tot esto la “gomeque” por aquí.

  4. Aragonés Fiero, me dole reconoixer-lo, pero me decanto más per la tercera opción que pllanteas. Quanto más se esllargue el debate estéril, millor ta ellos. I así el tiempo irá fent el resto…

  5. Cancingllo y Aragonés Fiero. A clave d’a votación estió en os representants d’as asociacions de pais y en os representants d’os colechios privaus. O PP no se pensaba brenca que i votasen en contra; creyeba que los teneba controlaus, sobretot os privaus. Ye por ixo que no creigo pas que o PP tenese calculada a chugada.

  6. Informau, gracias per la tuya aclaracion. Me pareixe ben que las asociacions heigan dau ixe golpe d’efecto, encá que no servirá ta res. Agora cal preguntar-se: impllantant la nueva llei de llenguas en unos pllaços más o menos raçonablles, con tot lo que mos é caen en materia de recortes, evitará la reforma que l’aragonés desapareixca? Talment soi demasiau pesimista, pero no creigo. Ay… Pobre llengua, qué mala sort has teniu, contino bregant ta afogar-te al cabo.

  7. Nomás sé que por dezaga d’a politica lingüistica d’o PP s’amaga a EFA, y más que más bellas personas que tienen asegurau un puesto d’asesor.

    Manuel Castán. LICENCIAU en filolochía hispanica. Se le conoxe en o mundo de l’aragonés dende Chuntos por l’aragonés. Dende allora dica o suyo nombramiento en o CSLA se le veyeba en tot o que se feba por l’aragonés. Dimpués d’o suyo nombramiento se l’ha dixau de veyer.

    Fernando Sánchez. Licenciau en QUIMICA con bella asignatura de filolochía hispanica. Parti activa de Ligallo primer y Nogará dimpués, se le veyó fendo fainas dica o suyo nombramiento en o CSLA, a penar de que suposaba a parti que representaba a faina d’as asociacions. D’o plano laboral y d’o que le aportaría ista ley millor no charrar.

    Marta Marín.Licenciada en PERIODISMO. Miembro d’o PSOE d’a Val d’Echo y responsable d’a revista bisas de lo subordán. Esfensora de l’aragonés cheso

    Han accedu a colaborar con o PP sin importar-les o tema d’o catalán, a penar de que o suyo prinzipal refirme ha estau de chen y entidaz que esfienden a reyalidat trilingüe d’Aragón.

    Toda ista hipocresía podría no estar mal si aconseguisen fer cosas por l’aragonés, que siempre en será más que no o que se fa agora. Manimenos, as primefas accions de Castán son de pura Vendetta, aprofitando a suya nueva posición d’amigo d’o PP ta cargar-se a chen que no ye ni sisquiera nagorista, sino que s’han manteniu neutrals desembolicando una gran faina por l’aragonés, antimás en bel caso partindo d’as variedatz. En bel caso s’ha feito ferindo a ran personal y emocional. Y tot isto ye precisament lo que l’aragonés no amenista.

  8. La verdat é que desconoixco los alberos de las asociacions, pero el panorama que mos ensenyas, Franchet, é muito pillor del que me podeva preixinar. Dan ixe cainismo sí soi convenciu de que l’aragonés se mos muere d’aquí a poquez anyos.

  9. Coneixia alguns aspectes del que diu el Franchet. Per un costat, em sembla molt trist que els amics de l’aragonès no defensin clarament la realitat trilingüe d’Aragó. Per altre costat, em sembla més trist que hi hagi aquestes carnisseries cap a gent neutral de l’aragonès (alguns els més vàlids i vàlides de tots, que han dedicat tota la vida amb il.lusió i sense egocentrisme).

    • Artur, la gen que respeta sincerament l’aragonés te aseguro que fa lo propio con el català d’Aragón, perque una i atra son llenguas girmanas. Sería un sinsentiu fer lo contrario. Atra cosa é partius políticos como el PP i el PAR: ixes ya puez tenir per ben seguro que no respetan ni defienden l’aragonés i per tant tampoc el catalán d’Aragón. I sí, lo del cutiello per la esquena en las asociacions pro-aragonés e prou triste. Un abraço ben fort ta toz los que, astí enforiconaus en la Franja, vaz recllaman los vuestros dreitos llingüísticos día a día. No rebllez brenca!

  10. En muitos anyos conoixendo a chent que treballa de firme por l’aragonés, nunca no he visto a denguno que no defienda en totz os foros posibles a realidat trilingüe d’Aragón (con diferents libels d’implicación), y decir que a ixas personas no les importa o tema d’o catalán ye mentir, por desconoiximiento u intencionadament. Por ixo, a resta de cosas que dices ya no las creigo guaire, pero me fería goyo que fuesen verdat. Ya que teneses razón y o PP estase mirando de fer bella cosa mas que derogar a lei y deixar morir as luengas mesmo charrando con os consellers nombraus por l’anterior gubierno. Si ixo fuese cierto, bella cosa habremos ganau en istos zaguers anyos: fa bells anyos, d’os partius institucionals, nomás a CHA teneba una posición clara por as luengas. D’astí hemos pasau a que IU tienga una posición no negacionista (dica o punto de votar contra la lei, por curta), dimpués o PSOE, con l’anterior departamento de cultura. Sisquiera tamién o PP y o PAR, tiengan a suva visión positiva y no negacionista enta l’aragonés y o catalán, y istas no sigan vistas nunca mas como una parte d’a pleitina politica. As luengas nuestras han d’estar una qüestión transversal, defendidas y emplegadas en totz os ambitos, ideolochías y partius! Que en o Consello Escolar haigan estau os vocals conservadors, amanaus a PP-PAR, os que han abocau o resultau en favor d’a dignidat d’as nuestras luengas ye unatro sinyal bien positivo.

  11. Sí, Cardelineta, tot lo que dices é asperançador. El probllema que tien hue l’aragonés (tamé el català d’Aragón, pero talment menos) é el tiempo. El tiempo juga en contra nuestra. En Catalunya, la codificacion del català va emprencipiar astá per el 1900. No eva una llengua en pelligro, i la hi charravan la inmensa mayoría de los catalans. Hue, a 2012, encá no han acabau los filólogos del IEC con el suyo treballo. Lo que quiero dir é que, muy probabllement, haigam pllegau tardi ta salvar a un muerto.

  12. Cardelineta. Si no te lo creyes, pos no lo faigas, pero en breus veyerás publicas as vendettas que digo.

    Más datos: qué asociacións de l’aragonés y partius han criticau ista ley?

  13. Prou que deseyo que sigas entivocau u tiengas una percepcion erronia d’ixas “vendettas”, estimau Franchet. Cambios, sí que se’n precisa, no pas vendettas. O que sí que sería bueno ye ixo que “deixas cayer” que o PP querese tener una politica lingüistica activa, sería un cambio significativo, que no s’hese produciu si no por a lei de luengas actual y os movimientos d’os zaguers anyos.

    Asociacions como o REA y Nogará y partius como CHA, IU, PSOE, Puyalón/BIC ya han feito publico o suyo refús. Atras como a SLA, CFA, EFA y LFA (y partius como TA-EA) no l’han feito encara, pero de seguro que lo ferán (u talment l’han feito u lo ferán en atros foros y ambitos), ya que totz son contrarios a ista vasuera de lei. Por cierto, hue mierques se reúne o CSLA, a on son representadas muitas d’istas entidatz, a veyer qué pasa!

    Cacingllo, tiens toda la razón, pero permite-me que me’n faiga contento d’as poquetas cosas asperanzadoras que se troba.

    • Sí… Yo tamé penso que é millor allegrar-se de las chicotetas cosas que se ganan día par d’atro, perque si no valdría la pena pllegar del tot. I dices que hue mierques se ajuntava el CSLA? Ya mos irez informant de tot a los que seguim el futuro de l’aragonés menos de cerca! Un saludo, Cardelineta!

      • Por o que se’n sabe, han decidiu de fer un informe sobre l’Abantprochecto. Será o segundo informe negativo de dos feitos por organismos consultivos… Veyeremos qué pasa si as alegacions no son atendidas.

  14. Pingback: O mundo de l’aragonés debant d’a nueva lei de no-luengas | Arredol - La Franja

  15. hola soc catala de barcelona o sigui que fablo la lengua aragones oriental ….

  16. Rolde d’Estudios Aragoneses ha presentau un manifiesto en defensa de las llenguas minoritarias d’Aragon. A día 9 de juliol de 2012 hi son dica 149 las personas que lo hi han achompau. Lo emocionant é que son gen de Galicia, Asturias, Aragon, Catalunya, Francia, Alemania… De tot el mundo. Talment encá estem a tiempo d’aturar la muerte de la nuestra llengua!

Deja un comentario

Tu dirección de correo electrónico no será publicada. Los campos necesarios están marcados *

Connect with Facebook

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.