O conservador Samarás vence en unas achustadas eleccions chenerals griegas

Samarás, de ND, vence a tamás d'o fuerte castigo a os dos partius mayoritarios griegos, ND y PASOK

Parlamento griego. Foto: Kirk Siang

Ahiere se celebroron eleccions chenerals en Grecia, a on se vivió un tierratremo electoral debiu a la fuerte puyada d’a Coalición de Cuchas Radical SYRIZA, asinas como o castigo a las dos prencipals formacions, PASOK y Nueva Democracia (ND) y a fuerte puyada tamién d’o partiu neonazi Amaneixer Dorau.

Samarás, d’o partiu conservador Nueva Democracia, ye o vencedor d’as eleccions, a tamás de perder refirme, consiguindo un 18,9% d’os votos y 108 cadieras d’as 300, d’as que 50 les perteneixen por estar ganadors, seguntes a lei electoral griega. A Coalición de Cuchas Radical SYRIZA s’ha posicionau en segundo puesto, con una fuerte puyada plegando a un 16,8% d’os votos y 52 cadieras. L’atro partiu mayoritario chunto a ND, o socialdemocrata PASOK ha perdiu un 30% d’os votos, plegando nomás a un 13,2% de refirme y 41 cadieras.

Os dos partius mayoritarios perdioron votos pasando d’un 78% d’os votos en 2009 a un 32%, estando prou castigaus por a población griega, farta d’a suya politica d’austeridat y retalles. D’ista traza, as dos unicas formacions que han esfendiu istas politicas, no plegan a las 151 cadieras de 300 que amenistan ta fer un gubierno de coalición (en tienen 149). A grau crebadura electoral complica a formación de gubierno, que podría levar a una repetición d’as eleccions en a lo menos cinco semanas si no n’i hai acuerdo, o que se descarta dende ND. Tanto os liders de ND como d’o PASOK advogan por un gubierno d’unidat, encara que Venizelos, d’o PASOK, descarta pactar con ND, que yeran dica agora socios de gubierno. ND pretende pactar con os partius de caracter europeísta, un pacto que podría pasar por modificar bellas midas d’austeridat de vez que mantener-se en a eurozona.

Antiparti, existe preocupación por a gran puyada d’o partiu neonazi Amaneixer Dorau, que ha consiguiu un 7% d’os votos y 21 cadieras con un programa electoral de raso xenofobo y antieuropeu. O Partiu Comunista de Grecia (KKE) nomás ha puyau un 1% d’os votos, plegando a un 8,5% y 26 cadieras.

2 Rispuestas a O conservador Samarás vence en unas achustadas eleccions chenerals griegas

  1. Dabi Lahiguera

    O sistema politico puede cambiar, pero… nos cal una catarsis como a griega?
    Os neonazis, siempre i serán, o important ye qu nos les deixemos…
    A repeticion de as eleccions podria fer tener más votos a la cucha radical

  2. Dabi Lahiguera

    que a Nueva democracia y levar-se ixas 50 cadieras que se leva o ganador ¿? Por cierto qué mierda de sistemas politicos? a representatividat no existe ni de conya, ah! como aquí!

Responder a Dabi Lahiguera Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.