O Constitucional de El Salvador vieda albortar a una choven que podría morir en librar

A muller, prenyada de cinco meses, morirá si contina entabant con a chestación d'o feto, que no tien mica posibilidat de sobrevivir.

Protesa en una embaixada d'El Salvador (Foto: AI Mexico)

Protesa en una embaixada d’El Salvador (Foto: AI Mexico)

O maximo organo chudicial de El Salvador, a Sala d’o Constitucional d’a Corte Suprema de Chusticia refusó iste chueves permitir l’alborto terapeutico a una choven de 22 anyadas, malauda de lupus y con problemas renals. Os problemas de salut de Beatriz (nombre ficticio d’a choven que quier remanir anonima) meten a vida suya en periglo si contina entabant chestando o feto, que tasament vivirá bells segundos dimpués de naixer, ya que tien anencefalia (no tien parti d’o celebro).

A decisión, presa por quatre votos a un, seguntes informan meyos locals, acotola la vía churidica y nomás permite una saluda politica.

En El Salvador, l’alborto ye viedau en totz os supuestos y se considera un delito penau con garchola t’a mai y l’equipo medico que lo faiga.

A Comisión Medica de l’hespital a on que ye ingresada Beatriz determinó que a sola posibilidat ta salvar a vida suya yera que no continase con o prenyo. Manimenos, a Sala Constitucional diz que a choven ye tenendo lo tractamiento medico adequau y que a suya vida no ye en risque.

O caso de Beatriz ha creyau una gran polemica arredol d’a interrupción voluntaria d’o prenyo en o estau centroamericano y ha plegau dillá d’as suyas mugas. A-saber-las organizacions d’esfensa d’os dreitos humans han reiterau que cal permitir l’alborto terapeutico dau que o fillo que aspera Beatriz no tien mica posibilidat de sobrevivir. En contra, as collas ultraconservadoras se i han oposau de raso, a practicar a interrupción, y mesmo han plegau a decir que o caso suyo ye una respuesta a intreses politicos ta legalizar l’alborto.

En Espanya, o PSOE demandó por carta a lo president d’o Congreso, Jesús Posada, que una delegación d’a Cambra que viachaba ta El Salvador por motivos parlamentarios meyase a favor de Beatriz. Manimenos, os parlamentarios facioron oyius ixordos a la demanda y nomás o socialista Javier Barrero s’achuntó con miembros d’o Gubierno ta intresar-se por a situación d’a choven: “Hemos feito lo que hemos puesto, con a maxima delicadeza, porque son afers internos d’atro país”, expresó en declaracions a eldiario.es.

ZAGUER HORA: Podrían practicar un parto induciu a Beatriz ta prebar de salvar-le a vida

A ministra de Salut de El Salvador, María Isabel Rodríguez, ha dito que os medicos son prestos ta practicar-le un parto induciu, y no un alborto a Beatriz. “Ye esclatero que en iste inte, a interrupción d’o prenyo ya no ye un alborto, ye un parto induciu”, porque  “Beatriz pasó d’as 20 semanas de prenyo”, declaró a la prensa.

Adhibió que tot lo que se faiga “ye una decisión, primer, personal”, d’a muller, encara que matizó que “a decisión medica ye por dencima de tot”

O chueves, a Corte Interamericana de Dreitos Humans, demandó que se” prenesen midas urchents” y se permitise l’alborto terapeutico de Beatriz, ta salvar-le a vida.

Dende muitas organizacions mesmo s’heba demandau asilo politico en atros países y mientres as zaguers semanas bi ha habiu protestas en as embaixadas de El Salvador por tot lo mundo, en esfensa d’o dreito a decidir y d’o caso particlar de Beatriz.

 

Fuent: http://www.eldiario.es/sociedad/Constitucional-Salvador-rechaza-embarazada-inviable_0_137886287.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.