O dandaloso esdevenidero d’a Biblioteca d’a Muller en Valencia

A Plataforma Feminista de Valencia tien medrana de que a metat de chinero a Biblioteca y Centro de Documentación de Chenero de Valencia tranque de traza esfinitiva.

O president d'a Generalitat Valenciana, Alberto Fabra. (Foto: PPCV)

L’amortización, u extinción, d’a plaza d’a unica treballadora a o frent d’a Biblioteca y Centro de Documentación especializau en muller y chenero d’a Generalitat Valenciana ha devantau sospeitas d’entre as asociacións de mullers y movimientos socials sobre o suyo posible tranque.

Por l’inte, a Biblioteca trancó as suyas puertas l’atro 20 d’aviento y s’aspera que ubra o 16 de chinero. “Nos han dito de parola que va a haber un atra persona ocupando no sabemos qué plaza, pues ixa ya ye amortizada”, explanica a Diagonal Encina García, portavoz d’a Plataforma Feminista de Valencia, qui considera que l’obchetivo d’a extinción d’a plaza ye “mirar-se de trancar a biblioteca”.

Fuents d’a Consellería de Chusticia y Bienestar Social han asegurau a Diagonal que as denuncias sobre o tranque d’a Biblioteca no son fundamentadas y han remitiu un comunicau en o que a directora cheneral de Familia y Muller, Celia Ortega, las califica como “una falsedat auspiciada por un sindicato qualo unico obchetivo yera desinformar”, en relación con a denuncia feita por Intersindical Valenciana. Seguntes a Consellería, o centro tornará a ubrir y a prestar o suyo servicio con una nueva documentalista. Man y menos, a eliminación d’a plaza ha levau a bellas asociacións a pensar que a nueva profesional treballará a tiempo parcial.

“Quan le preguntemos [a Ortega] si iba a tener dedicación exclusiva, nos dició: ‘o que s’amenista ta que a Biblioteca marche’. Ixo ye una traza de no comprometer-se, pues puet ubrir unas horas de maitins y ya ye funcionando”, comenta Amalia Alba, presidenta d’a Federación de Mujeres Progresistas d’a Comunidat Valenciana.

Seguntes Alba, ista situación s’enmarca en o desintrés d’a Generalitat por os temas de chenero. “Ya tenemos bells sinyals: con a excusa de que no bi’n ha de diners no han teniu garra problema en cargar-se o Centro Reina Sofía sobre a Violencia de Chenero, reconoixiu entrenacionalment, con muitos anyos de desenvolique y en o que reyalment bi heba treballos y investigacións muit importants”.

Fuent: http://www.diagonalperiodico.net/El-incierto-futuro-de-la.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.