O Departamento d’Educación mete en funcionamiento cinco nuevos colechios pa lo venient curso 2013–2014

Se tracta d'os colechios d'os vicos zaragozanos de Val d'Espartera y Parque Goya, y d'as localidatz de Monzón, Monegriello y María de la Uerva

Colechio Monzón II. Foto: Gubierno d'Aragón

Colechio Monzón II. Foto: Gubierno d’Aragón

O curso 2013-2014 contará con a obridura de cinco nuevos centros educativos. Se tracta d’os colechios d’os vicos zaragozanos de Val d’Espartera y Parque Goya, d’as localidatz de Monzón, Monegriello y María de la Uerva.

Os tres primers edificios, o CEIP Val d’Espartera II, l’aulario de Primaria d’o CEIP Ronda Norte y o CEIP de Monzón serán en funcionamiento a primers d’o curso, mientres que o CRA A Sabina de Monegriello y o nuevo centro d’Infantil y Primaria de María de la Uerva ubrirán as suyas puertas en o segundo trimestre. Iste zaguer centro s’ha abanzau un anyo gracias a la colaboración d’a Diputación de Zaragoza y o Concello d’a localidat.

A istos se sumarán o escomencipie d’o funcionamiento d’os espacios enamplaus en quatro centros: l’ixample d’o CEIP Guillermo Fatás de Santa Isabel y d’o centro Agostina d’Aragón de Zaragoza, d’o Miguel Artigas de Pinsec y d’o colechio Castiello Qadrit de Cadret. Antiparte, tamién se ye rehabilitando o colechio rural agrupau (CRA) de Santa Elulalia, en Teruel.

Istas actuacions forman parte d’o Plan d’Infrastructuras Educativas 2012–2015 d’o Gubierno d’Aragón que iste anyo ha suposau una inversión de mas de 17 millons d’euros. A ells se suman os 550.000 euros aportaus por a Diputación Provincial de Zaragoza y os 180.000 euros d’a Diputación Provincial de Teruel pa acometer actuacions de millora en os centros aragoneses. En iste sentiu, en total se son acometendo obras en 76 colechios d’as tres provincias.

Caracteristicas

– Aulario de Primaria d’o CEIP Ronda Norte de Zaragoza: o prochecto se realizará en dos fases y suposará una inversión d’amán de quatre millons d’euros. Ista primera fase, que será operativa en setiembre de 2013, consiste en a construcción de 12 aulas de Primaria y chimnasio.

– CEIP Val d’Espartera II: ye un colechio de tres vías (clases por curso). L’aulario d’Infantil d’o CEIP Val d’Espartera II constará de 9 clases, minchador, sala de psicomotricidat, escusaus, sala de profesors, zona de chuegos y atros espacios complementarios. As aulas serán ubicadas en planta baixa, orientadas t’o sud y se distribuirán arredol d’un patio. Ista primer fase suposa una inversión de 2,5 millons d’euros.

– CRA A Sabina de Monegriello: iste nuevo centro contará con dos aulas, una d’Infantil y unatra de Primaria, amás d’escusaus y zonas comuns. As instalacions suposan una inversión de mas de 221.000 euros.

– CEIP de Monzón II: as instalacions han suposau una inversión de mas de 4,7 millons. O colechio ubrirá as suyas puertas en setiembre con una vía; ye decir, 3 clases d’Infantil y 6 de Primaria, una por nivel educativo. Todas istas aulas son orientadas t’o sud y se completan con clases de desdoble y complementarias pa informatica, mosica, plastica, usos multiples, asinas como biblioteca, chimnasio y minchador.

–CEIP María de la Uerva: a obra suposa una inversión d’1,6 millons d’euros. Concretament a primers de 2014 será en funcionamiento l’aulario d’Infantil formau por 6 clases, o minchador y atros servicios complementarios.

– En o caso d’os ixamples d’o CEIP Guillermo Fatás de Santa Isabel contará con seis nuevas aulas, amás de despachos y escusaus. Se tracta d’a primer fase de l’ixample d’o centro y con un presupuesto de 461.000 euros. D’ista forma o colechio pasará d’estar un centro de 2 a 3 vías.

– O colechio Agostina d’Aragón de Zaragoza contará dende setiembre con seis aulas mas pa clases y desdobles y un nuevo minchador mas amplo; unas obras que suposarán una inversión d’amán de 341.000 euros.

– Os treballos d’o colechio Miguel Artigas de Pinsec permitirán d’enamplar as instalacions d’o centro con dos nuevas clases y una sala de psicomotricidat de 100 metros quadraus gracias a la colaboración d’a Diputación Provincial de Zaragoza. O presupuesto de licitación d’ista obra ye de 135.000 euros. Por a suya parte, o colechio Castiello Qadrit de Cadret dimpués d’o suyo ixample contará con un escusau y dos aulas mas d’Infantil. As obras ascienden a 48.000 euros.

– CRA Santa Eulalia: O colechio ye a siede central d’o CRA Santa Eulalia-Villar Cremato y a suya rehabilitación integral s’ha feito por fases. En a primera s’adequó l’ala an que actualment son ubicadas a mayoría d’as aulas y agora s’acomete a segunda. Os treballos se van a centrar en a millora y acondicionamiento d’una d’as alas de l’edificio, en a quala se va a realizar una inversión de 187.200 euros.

A rehabilitación permitirá d’apanyar a cubierta, amillorar os sistemas de calefacción y iluminación y adaptar os espacios, eliminando amás barreras arquitectonicas. L’edificio aloixa diferents despachos, oficinas, aulas de desdoble y escusaus.

Fuent: http://www.cronicadearagon.es/wordpress/?p=43305

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.