O desalcuerdo sobre o federalismo deixa a Nepal sin Constitución

Os partius no consiguen alcordar si os estaus federaus han d'estar amugaus u no sobre un alazet etnico. Os pueblos madheshi reivindican l'autonomía d'o sur d'o país

Sinyal de Nepal

O Nepal habrá d’ir t’as urnas o venient mes de noviembre dimpués de que os partius politicos d’iste país asiatico haigan estau incapables de meter-se d’alcuerdo sobre o modelo d’organización territorial que la nueva constitución habrá de definir. Dende que estioron esleixius en 2008, os 600 miembros de l’Asambleya Constitucional son estaus debatindo sobre qual habría d’estar o mapa d’o nuevo Nepal federal, pero o consenso no ye estau posible a causa d’as diverchencias sobre dica que punto os nuevos estaus federaus heban de alazetar-se en un mapa etnico u no pas.

O plazo que l’Asambleya Constituyent teneba ta promulgar una nueva Constitución remataba o 27 de mayo, pero as fundas divisions entre os partius han impediu conseguir-lo. ¿Qual ye a explicación? En o Peace and Collaborative Development Network, Sally Carlton resume a situación: ‘os maoistas esfenden una división d’o Nepal en estaus etnicos (cada colla etnica principal tendría o suyo propio estau federau), entre que os partius de centro-cucha s’estiman más que cadagún d’os estaus siga multietnico. A primer posición esfiende que, con estaus etnicos, cadagún d’os principals pueblos podría disposar d’ell mesmo y gubernar o suyo territorio. A segunda posición replica que ixo ferá que o Nepal se faiga más feble, tanto a ran interno como debant d’os suyos dos poderosos vecins (China y Indica), cosa que podría meter en periglo a mesma existencia d’o país’.

Os maoistas tienen o refirme d’os partius d’o Terai, a redolada meridional d’o Nepal habitada por os pueblos madheshis. A mayoría d’istos partius fa anyadas que reivindican l’autonomía d’o territorio suyo -y belunos, mesmo a independencia-. Os madheshis se queixan de que historicamnet son estaus marchinaus por l’Estau nepalés, qui consideran que nomás beneficia a la capital, Katmadú.

Como no bi ha habiu alcuerdo, s’habrán de fer eleccions o venient 22 de noviembre ta esviellar l’Asambleya Constituyent y mirar de trobar una salida a ista situación.

O Nepal abolió a monarquía en mayo de 2008, quan l’Asambleya Constituyent – la mesma que agora no s’ha meso d’alcuerdo sobre o modelo territorial – decidió sacar a o rei Gyanendra y convertir o país en una republica federal.

Fuent: http://www.nationalia.cat/ca/noticies/1144

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.