O dibuixant de comic Jacques Tardi refusa a Lechión d’Honor

Refusa a distinción ta "continar estando un hombre libre"

L'autor sinyando as suyas obras (Foto: Wikpedia)

L’autor sinyando as suyas obras (Foto: Wikpedia)

Jacques Tardi, un d’os más populars autors de comic francés, refusó iste martes a Lechión d’honor, una d’as más importants distincions d’o Estau Francés, por querer «continar estando un hombre libre y no estar rehén de garra autoridat».

Tardi ha dito enterar-se «con sorpresa a traviés d’os meyos de comunicación, que as autoridatz plegaban de dar-me, sin haber-me informau antis a Lechión d’Honor». «Un no ha d’estar a la fuerza contento en estar reconoixiu por chent que no quiere«, diz tamién en un comunicau que ha feito publico.

L’autor de comic ye famoso, entre atras razons por o caracter antimilitarista d’as suyas obras. En belunas i charró d’a Primer Guerra Mundial, como «Puta guerra» y «A guerra d’as trincheras», y recientement publicó «Moi, René Tardi, prisonnier de guerre au Stalag II B», basada en a historia de su pai, militar de carrera, qui combatió en a II Guerra mundial y estió preso en Alemanya. Manimenos o suyo titol más conoixiu ye «As extraordinarias aventuras d’Adèle Blanc-Sec», un comic que prencipió a escribir en 1976 y que reconta as aventuras d’una periodista en o París d’entre as anyadas 1911 y 1922.

A Lechión d’Honor ye una distinción que creyó Napoleón en 1802 y que se da a qui «ha prestau un merito excepcional t’a nación«. Antis que Jacques Tardi, atras personas como o compositor Hector Berlioz, o  pintor Claude Monet u o poeta Louis Aragon refusoron o galardón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.