O dictador archentino Videla condenau a 50 anyadas por furto de bebés

Ye a tercer condena contra o dictador

Jorge Rafael Videla, en 1979 (Foto: Wikipedia)

Jorge Rafael Videla, en 1979 (Foto: Wikipedia)

O dictador archentino, Jorge Rafel Videla, ye estau condenau ista maitinada a 50 anyadas de garchola por o furto sistematico de bebés mientres a dictadura militar que surfrió Archentina entre 1976 y 1983. Ixa yera a demanda que feban a fiscalía y as Mais d’a Plaza de Mayo y ye a tercer condena equivalent a cadena perpetua que caye sobre o dictador.

O chuicio prencipió en 1996, quan se denuncioron 35 casos ocurrius en  os centros clandestinos de detención de La Cacha, a Comisaría Quinta de La Plata, o Pozo de Banfield, o Vesubio, l’Olimpo, Automotores Orletti, Campo de Mayo y a ESMA. En a sentenci, que Varela recibió sin tartir, se consideró prebada a “practica sistematica y cheneralizada de furtar, retener y amagar ninos menors de 10 anyadas” en o contexto d’un “plan cheneral d’acotole de parti d’a población civil con l’obchetivo de rematar con a subversión”.

Chunto a Videla estioron condenaus o tamién dictador Reynaldo Bignone, a 15 anyadas, Antonio Vañek, ex-almirante, a 40 anyadas, Jorge Eduardo Acosta, ex-capitán de fragata, a 30 anyadas y l’ex-cheneral Omar Riveros, a 20, entre atros cargos d’a dictadura.

Seguntes as organizacions humanitarios encara quedan 400 denuncias pendients de ninos fuertas en ixas envueltas, encara que ya son 105 los que han puesto recuperar a suya identidat. Bellas 300 familias han deixau datos en bancos d’ADN con l’asperanza de trobar a los suyos fillos y nietos furtaus. Se calcula que bellas 30.000 personas “desapareixioron” mientres a dictadura.

A periodista de 360TV ubrió a noticia con a frase “No sé en atros países, pero en l’Archentina, tenemos memoria”, en una esclatera referencia a la polemica por os chuicios contra Garzón por investigar os crimens d’o franquismo.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.