O domingo 30 se celebra en Zaragoza a primer Chornada de chuegos alternativos (y atras frikadas)

O venient domingo as Casas de Choventut de Santa Isable y Actur organizan en Zaragoza ista chornada en o centro El Tunel d'Oliver

jornadas-frikis-212x300Iste domingo 30 de chunio se celebra a I Chornada de chuegos alternativos (y atras frikadas) de Zaragoza, organizada por as Casas de Choventut de Santa Isabel y Actur. Como sinyala o titol de l’evento, son adedicadas a chuegos de mesa que no gosan trobar-se en chugueterías tradicionals ni en grans superficies comercials.

“Son chuegos que estimulan de vez a sociabilidat y l’intelecto. Se tracta d’un novedoso evento endrezau a un cada vegada mas numeroso publico aficionau a os chuegos, a o rol, comic, jugger, etc. En as Casas de Choventut existe una tradición d’uso d’istes chuegos, habendo participau en qualques torneus de caracter estatal” cuentan dende a Casa de Choventut de Santa Isabel.

En ista primer chornada se podrán chugar partidas de grans chuegos clasicos como Tastan, Munchking, Carcassone, Bang, a Danza d’o Uego, Jungle Speed, Ciudadelas u Zombies y d’as zagueras novedatz amaneixidas recientment como Bonansa, Okiya, Zombicide, Cartcassonne y Mow. En a zona de chuego libre s’explicarán as normas basicas y s’amprará chuegos. “Pa los chugarrins, imos a realizar quatro torneus de chuegos de culto como son Bang, Mag Blast, Tastan y Carcassone, con interesants premios que han estau aportaus por as botigas especializadas d’a ciudat, que s’han vulcau con l’evento. Amás l’asociación Códice Games realizará una gymkhana detectivesca, Grupo Afternoon realizará muestras de miniaturismo y scenografía y o Club de Fans de Star Trek organizará partidas tematicas sobre a famosa saga galactica” adhiben.

Entre tot o día se premiará a participación en chuegos y torneus asignando puntos seguntes ganen u pierdan en os diferents chuegos que vaigan practicando-se, premiando con un cheque-present a o ganador u ganadora.

A Chornada se desembolicará en o Centro d’Artes pa Chovens El Tunel en o Paseu Soldevilla, en o vico Oliver, dende as 11.00 d’o maitín dica as 20.30 horas. I habrá diferents espacios pa los torneus, zona de chuego libre, exposición de maquetas y una feria en a quala participarán as prencipals botigas y asociacions especializadas d’a ciudat: 5 Reinos, Taj Mahal, El Vecino de la Bestia, Milcomics y Nexo Games. Amás se i habilitará una zona ta fer una chenta de convivencia.

A entrada será libre y gratuita y ye posible d’inscribir-se en os torneus o mesmo día de l’evento, encara que tendrán prioridat aquellas personas que haigan reservau plazas previament a traviés d’as Casas de Choventut de Santa Isabel y Actur. Pa mas información y preinscripcions dirichir-se a la Casa de Choventut de Santa Isabel (cjsantaisabel@zaragoza.es / 976 726 022) u a la Casa de Choventut de l’Actur (cjactur@zaragoza.es / 976 726 052).

Fuent: http://arainfo.org/2013/06/el-domingo-30-se-celebra-en-zaragoza-la-primera-jornada-de-juegos-alternativos-y-otras-frikadas/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.