O ex-primer ministro islandés, absuelto d’estar responsable d’a crisi d’o país suyo

Geir H. Haarde yera acusau de no atender a los avisos sobre a crisi d'os bancos que tenioron bancarrota.

Geir Haarde (Foto: Wikipedia)
Geir Haarde (Foto: Wikipedia)

O ex-primer ministro islandés Geir Haarde ye estau absuelto de tres d’os quatre cargos que le’n acusaban sobre a suya responsabilidat en o colapso d’o sistema bancario d’Islandia en octobre de 2008, que deixó a lo país quasi en bancarrota. Haarde ye estau condenau nomás por haber violau a lei sobre a responsabilidat de no haber convocau reunions d’o consello de ministros t’analizar a situación.

A decisión de l’alto tribunal islandés implica que l’ex-primer ministro no habrá d’ir t’a garchola y que l’estau habrá d’asumir os gastos d’o chuicio.

L’acusación, representada por o parlamento, consideraba que Haarde tenión una conducta grau quan as institucions financieras y la tesoreria estatal d’Islandia se trobaban en periglo. Un periglo que ell en heba d’haber parau cuenta. Haarde ye estau chuzgau por o Landsdómur, un tribunal especial ta procesos que afectan a miembros d’o gubierno, instituyiu en 1905 y que dica agora nunca no heba actuau.

Iste ye estau o primer dirichent d’o mundo incriminau por a crisi financiera mundial. Dende o primer inte Haarde ha negau que hese violau a lei de responsabilidat d’os ministros por no haber feito caso d’os avisos d’una crisi inminent d’os principals bancos islandeses, y demanda que se tranque o caso, que ell considera una farsa y un proceso politico.

Haarde ye l’unico politico procesau dica agora, pero bi ha voces que demandan que tamién siga procesau David Oddsson, primer ministro conservador entre 1991 y 2004 y prencipal empentador d’a politica neoliberal que levó a Islandia t’a bancarrota.

Por causa d’a bancarrota d’os bancos islandeses y d’as protestas populars que bi habió, o 1 de febrero de 2009 dimitió tot lo gubierno. En as ellecions de dimpués os electors trigoron a lo Partiu Socialdemocrata de Jóhanna Siguöardóttir, partidario de no reblar debant d’a presión d’o Fundo Monetario Internacional, de Gran Bretanya y d’os Países Baixos, que desichiban compensacions a lo chicot país  por as deudas contrayidas por a indemnización d’o banco Icesave. Antimás, o nuevo gubierno promueve un esvielle d’a constitución, a traviés d’una asambleya popular que ya la ha elaborada.

 

Fuent: http://www.vilaweb.cat/noticia/4005238/20120423/lex-primer-ministre-islandes-absolt-responsable-crisi-pais.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.