O Festival de Jazz plega en Zaragoza con un programa de altisma calidat

Andrea Motis & Joan Chamorro Quintet, Chick Corea & The Vigil, David Murray, CMQ Big Band, Jeff Lorber y Dr. Lonnie Smith conforman o cartel d'ista 32ª edición d'o festival

festival jazz zaragozaO millor jazz torna ta Zaragoza o proximo agüerro, con a celebración d’a 32ª edición d’o Festival de Jazz, que coorganizan o Concello, a traviés d’a sociedat municipal Zaragoza Cultural, y a promotora de conciertos Siamm Produccions, contando amás con o patrocinio destacau de Bieras Ámbar.

Mientres mas de tres decenios, o Festival Internacional de Jazz de Zaragoza ha estau o catalizador d’ista mena de mosica en a vida cultural d’a ciudat, y por os distintos scenarios en que s’ha realizau mientres istes anyos, dende o Teatro Principal ta l’Auditorio, pasando por o Palacio d’os Esportes u l’antigo Cine Coliseo, han desfilau todas as grans figuras mundials d’o chenero, en totz os suyos estilos y especialidatz. En conseqüencia, o Festival de Jazz de Zaragoza s’ha feito no nomás en un d’os mas prestichiosos d’o nuestro país, sino que tamién ha chugau un important papel en a divulgación d’o jazz y en a consolidación d’un publico numeroso y estable, imprescindible t’o funcionamiento y a continuidat d’un evento anyal d’ista categoría.

Amás, o Festival de Jazz de Zaragoza ha contau siempre con o vivero de mosicos locals de jazz, incluindo a grupos locals en o cartel, promovendo actuacions, jam sessions y actividatz paralelas en distintos locals y salas d’actuación. Tamién desenrolla una important actividat didactica y divulgativa entre os mas chovens, con l’obchectivo de chenerar nuevos publicos y ixamplar o espectro de qui desfrutan con ista mena de mosica.

Programación de primer nivel internacional

A modo de presentación d’o festival, o 18 de setiembre serán Andrea Motis & Joan Chamorro Quintet (con o saxofonista italiano Luigi Grasso como mosico convidau). Andrea ye sin dubda a revelación mas destacada d’o jazz vocal d’o estau espanyol d’os zaguers tiempos; con tasament 20 anyos, l’artista barcelonesa en leva ya cinco sin puyar a os scenarios de traza profesional y sorprendendo por a suya precocidat y capacidatz. Y siempre con o suyo mentor Joan Chamorro.

Ya en as habituals calendatas de noviembre, o festival propiament dito s’iniciará con una d’as figuras capitals d’o jazz contemporanio, Chick Corea. A os suyos 74 anyos, convertiu en leyenda viva d’o jazz, o pianista norteamericano sigue reinventando-se de contino y en Zaragoza presentará o suyo prochecto mas recient, Chick Corea & The Vigil, en que se rodia de chovens mosicos d’enorme talento. Sin dubda, Corea será a gran estrela d’ista edición.

En a siguient chornada contaremos con o quarteto d’o saxofonista David Murray. Considerau como un d’os saxos tenors mas destacaus d’os zaguers decenios, de tecnica virtuosa y soniu muito personal, mientres a suya carrera Murray s’ha ganau un soliu prestichio entre os aficionaus combinando o legau de clasicos como Coleman Hawkins con as incursions en o free jazz.

A CMQ Big Band, integrada por 17 mosicos cubanos y espanyols baixo a dirección d’o pianista Luis Guerra y d’o baixista y cantant Alain Pérez –un fixo de Paco de Lucía entre o zaguer decenio–, ferá un homenache a Beny Moré, o mas influyent patriarca d’o son cubano. A CMQ Big Band revisa beluns d’os temas mas conoixius de “El Bárbaro del Ritmo” a partir d’os arreglos orichinals.

O protagonista d’o sabado será Jeff Lorber, un extraordinario teclista que tien una gran virtut, y ye precisament a capacidat de sorprender o que lo fa caracteristico. A suya discografía contrimuestra que se’n mueve con habilidat por os mas variaus terrenos d’a fusión. En ista ocasión plega en a capital aragonesa con tres grans d’o chenero: Jimmy Haslip (baixista d’o mitico grupo The Yellowjackets), o saxofonista Eric Marienthal y o batería Gary Novak. Un luixo t’os amants d’un d’os sonius mas chenuinos d’os anyos 70 y 80.

Por zaguer, Dr. Lonnie Smith, posiblement o zaguer gran mayestro de l’organo Hammond; un mosico heterodoxo y de brillant trachectoria, que aconsiguió reconoixencia a traviés d’os suyos treballos con George Benson u Lou Donaldson, y que mete en practica una excitant mescla sonora que parte d’a tradición d’o jazz y o blues sin deixar de costau a experimentación ni un poderoso groove funky.

Cal sinyalar que, fueras d’o caso de Chick Corea, totz os artistas que actuarán en o Festival de Jazz de Zaragoza se presientan por primer vez en a nuestra ciudat, o que constituye un atractivo adicional a la programación que s’ha parau ta ista trenteno-segunda edición.

Ta l’asistencia a os conciertos, que se celebran en l’Auditorio de Zaragoza, en las Salas Mozart (Andrea Motis & Joan Chamorro) y Multiusos (totz os demás), s’ha meso a la venda un abono por importe de 110 euros. Antiparte, o pre d’as entradas sueltas t’as distintas actuacions oscila entre os 15 y os 38 euros, seguntes os casos.

Actividatz complementarias

Finalment, o Festival de jazz se complementa con una serie d’actividatz paralelas y divulgativas que ya s’han convertiu en habituals en as anteriors edicions. Son as siguients:

Domingo 8 de noviembre – Sala Luis Galve – 10.00 y 12.00h. Jazz en Familia. Pre: 6 € Monkayo Jazz Band

As nuestras Mosicas chueves 5, viernes 6 y sabado 7 de noviembre -Teatro d’as Cantonadas – 23.30h. Jam Sessions en o Espacio Ambigú. Entrada libre

D’o 20 de noviembre a o 3 d’aviento Jazz a la Marguin. Entrada libre con invitación. A vinteno-primera edición se realizará en os centros civicos d’a Marguin Cucha.

Fuent: http://arainfo.org/2015/09/el-festival-de-jazz-llega-a-zaragoza-con-un-programa-de-altisima-calidad/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.