O festival de reggae Lagatavajunto fa diez anyos

A mosica ska y reggae aragonesa tendrán un puesto privilechiau en o Festival de Lagatavajunto, que se traslada ta Zaragoza. Roy Ellis será l'actuación estelar

cartel lagatavajuntoYa un clasico de totz os veranos, dende fa diez anyos, o festival de reggae d’Aragón Lagatavajunto ye una cita imprescindible pa los fans d’a mosica reggae. O festival manimenos contará con una novedat ista edición, y ye que no se celebrará en a localidat de Lagata como leva fendo dende que empecipió, sino que lo ferá en Zaragoza, en o camping municipal debant d’a imposibilidat de fer-lo en a localidat que dio o nombre a o festival. O festival se celebrará iste cabo de semana, os diyas 2, 3 y 4 d’agosto en ditas instalacions.

O festival contará con l’actuación estelar d’o cantaire chamaicano Roy Ellis (a.k.a. Mr. Symarip), que actuará chunto a la colla gallega The Transilvanians como actuación internacional. Pero tamién i hai espacio (y muito) pa lo ska, rap y reggae aragonés, con as actuacions de El Último Skalón, The Brodies, Irregular Roots, Rapsusklei & The Flow Fanatics, a tornada t’os scenarios dimpués de dos anyos d’a mitica banda aragonesa de reggae Jah’sta, y a reunión especial pa lo festival d’a despareixida banda We&Dem, que ferán una unica actuación d’homenache, fendo una uellada ent’os prencipios de Lagatavajunto. Tamién i serán collas y mosicos d’a resta de l’Estau, como Chulito Camacho (Madrit), Green Valley (País Vasco-Barcelona), KiSap (Valencia) u The Kinky Coo Coo’s (Chirona).

Os soundsystem sonarán dica a fin d’a nueit dimpués d’os conciertos, habendo-ie tamién espectaclos de diyas con DJ’s a o canto d’a piscina en o espacio habilitau pa lo festival y mercadetz. O espacio d’o festival, asinas como as entradas, incluyen puesto d’acampada en o camping.

O festival ye organizau dende 2004 por l’Asociación Cultural “El Hospizio” de chovens de Lagata. Lagatavajunto ye un referent a nivel estatal d’a mosica reggae, congregando a unas 3.000 personas cada diya en a pasada edición. Pa mas información: http://www.lagatavajunto.es

Una rispuesta a O festival de reggae Lagatavajunto fa diez anyos

  1. Pingback: O festival de reggae Lagatavajunto fa diez anyos | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.