O Festival Internacional de Cine de Uesca convoca a suya 43 edición confirmando o suyo nuevo ciclo

O festival será dende o 13 a o 20 de chunyo y preseleccionará curtometraches t'os Oscar en a categoría de millor curtometrache de ficción

Jesús Bosque, Azucena Garanto y Ramón Día mientres a presentación d'o Festival. Foto: Concello de Uesca

Jesús Bosque, Azucena Garanto y Ramón Día mientres a presentación d’o Festival. Foto: Concello de Uesca

A 43ª edición d’o Festival Internacional de Cine de Uesca encomenza, a cita será d’o 13 a o 20 de chunyo en a capital altoaragonesa. O certamen, que sirve de preselección t’os Premios Oscar de Hollywood en a categoría de millor curtometrache de ficción, se mantendrá fidel a la suya esencia, potenciando os suyos tres concursos de curtometraches: Internacional, Iberoamericano y Documental.

En l’apartau d’os premios será an que se dé una d’as novedatz d’estianyo: a creyación d’o Premio d’o Publico Aragón Televisión, gracias a l’alcuerdo a o que s’ha plegau con l’ente publico aragonés y que consiste en a compra d’os dreitos d’emisión d’o curto que sía distinguiu con ista reconoixencia, amás d’una campanya d’emparo y difusión d’o mesmo.

A resta de puntals d’o festival conservarán o suyo papel destacau, d’ista traza os largometraches tendrán o suyo espacio en a muestra de “Nuevos Realizadors” mientres que os premios Ciudat de Uesca y Luis Buñuel, reconoixerán un talento consolidau pero con un gran futuro y toda una carrera dedicada a o seteno arte, respectivament. A siede prencipal se mantiene en o teatro Olimpia pero se ferá especial esfuerzo en potenciar una d’as claus de l’exito d’o pasau anyo, “as procheccions en a carrera tenioron una gran acceptación y ta nusatros ye fundamental a connexión con o publico”, explicoron os suyos organizadors.

L’organo promotor d’o festival, a Fundación Festival Internacional de Cine de Uesca, tamién ha anunciau una renovación en as suyas ordinacions, “una adaptación a os nuevos tiempos que dende o patronato considerabanos fundamental, ta ixo ha estau imprescindible l’emparo unanime d’as prencipals institucions financiadoras”, explicaba o suyo president, Ramón Día.

“Quantos miembros d’a mesma, que han estau claus en a creyación y larga trachectoria d’o certamen, ceden os suyos puestos pero seguirán ligaus a o festival como parte viva y activa d’a historia d’o mesmo”, adhibiba. O suyo antigo director, Jesús Selva, cede a endrecera ta Azucena Garanto, antiga codirectora artistica. “Ye o trango natural y a confirmación d’a transición que s’inició o pasau anyo”, explica Selva.

Se mantiene o premio Pepe Escriche que proposará a Fundación y que pretende reconoixer a labor d’unión entre diferents culturas a traviés d’o cine, podendo recayer sobre entidatz, institucions, personas u manifestacions cinematograficas u audiovisuals.

Inscripción ubierta

O plazo de presentación de treballos t’os tres concursos de curtometraches ya s’ha ubierto y dende a organización agradeixen l’intrés amostrau entre totz istos meses. “Son muitos os directors y productors que nos han contactau preguntando por a proxima edición. Uesca ye un festival de referencia y estar preseleccionador a os Oscar ye qualcosa d’o que muit pocos festivals pueden desfrutar”, afirmaba a nueva directora Azucena Garanto.

O festival de Uesca no solament conta con l’aval de Hollywood sino tamién con o de l’Academia d’as Artes y as Sciencias Cinematograficas d’o Estau espanyol t’os Premios Goya.

A plataforma online Festhome será de nuevo a vía ta canalizar a recepción d’os curtometraches. “Ye un metodo rapido y sencillo que permite a qualsiquier cineasta d’o mundo presentar a suya obra en Uesca” explicaba Garanto. O plazo finalizará o 13 de marzo y solament se podrán presentar obras realizadas dende 2014.

A ilustradora holandesa Eline Van Dam realizará o cartel oficial

A proxima edición d’o festival contará con a prestichiosa ilustradora holandesa Eline Van Dam t’a realización d’o cartel oficial. Van Dam ye una artista con una larga trachectoria como autora de cartels, portaladas de discos y libros asinas como anuncios y camisetas; ha realizau treballos ta medios de comunicación y interpresas como New York Times, Esquire u Ray-Ban.

“Poseyedora d’un estilo muit personal, Eline ye capable d’experimentar con qualsiquier tonalidat basada en a psicodelia d’os anyos 70. Unas senyas d’identidat que le han permitiu d’exhibir a suya obra por tot o mundo, con exposicions dedicadas a la suya persona en ciudatz tant sinyaladas como París, Bruselas u Düsseldorf”, apuntaba Azucena Garanto.

A calidat d’os cartels d’o Festival Internacional de Cine de Uesca ha estau reconoixida en diversas ocasions aconsiguindo premios internacionals como a medalla de bronze d’os Film Festival Posters en 2012, por un treballo realizau por o fotografo Chema Madoz con a participación d’o disenyador Isidro Ferrer. O propio Ferrer ye qui en iste 2015 colabora de nuevo con o festival como asesor en iste aria.

Fuent: http://arainfo.org/2015/02/el-festival-internacional-de-cine-de-uesca-convoca-su-43-edicion-confirmando-su-nuevo-ciclo/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.