O FLNC deixa as armas pa que Corcega se sume a la “fase de conquista politica” d’os “movimientos chermans”

O grupo considera que l'Asambleya de Corcega ye fendo trangos que l'independentismo reclamaba dende feba decenios

corcegaConfirmando a tendencia en a Europa occidental entre os dos zaguers decenios, o Frent de Liberación Nacional de Corcega (FLNC) ha anunciau a suya decisión d’empecipiar un “proceso de desmilitarización y de salida progresiva d’a clandestinidat“. A prencipal organización armada corsa, asinas, se fica en o camín emprendiu por l’IRA en Irlanda d’o Norte y ETA en o País Vasco: defiende a sobiranía por vías exclusivament politicas y democraticas.

De feito, as referencias a o contexto europeu ocupan una parte d’o comunicau en que o FLNC anuncia l’abandono d’as armas. Sin mencionar dreitament por o nombre a IRA y ETA, a organización corsa explica que “dimpués d’anyos de resistencias y de sacrificios, as luitas vascas y irlandesas han permitiu d’aconseguir enantos politicos determinants. Istes movimientos chermans han empecipiau una fase de conquiesta politica”, que ye a fase en que agora o FLNC entiende que cal situar a luita d’os corsos por a sobiranía.

Efectivament, en Irlanda d’o Norte l’IRA mantiene un alto o fuego permanent dende 1997. O decomiso d’as suyas armas se completó en 2005. Dende l’alto o fuego, s’han sinyau os Acuerdos de Viernes Santo, que estableixen l’autonomía d’Irlanda d’o Norte y reconoixen o dreito d’os norirlandeses a decidir o suyo futuro, y o Sinn Féin ha aconseguiu progresos electorals notables, tanto en Irlanda d’o Norte como en a Republica d’Irlanda.

En o País Vasco, ETA anunció en 2011 l’abandono definitivo d’a luita armada. A fin d’as suyas accions armadas ha coincidiu con a obtención, por parte d’a cucha abertzale, d’os millors resultaus d’a suya historia. En 2012, Bildu se convirtió en segunda fuerza en o Parlamento d’Euskadi; y iste 2014, a coalición independentista ha estau a fuerza mas votada en o conchunto d’o País Vasco (Euskadi, Nabarra y País Vasco norte) en as eleccions europeas.

Referencia a os referendums d’independencia

En o suyo comunicau, o FLNC no solament se mira a atras organizacions armadas, sino tamién a os procesos pacificos que han conduciu, u conducirán, a la celebración de referendums d’independencia. O texto se refiere a o feito que “en atros puestos d’Europa, atros pueblos se paran pa recuperar a suya libertat. Os referendums se multiplican”, y cita os casos de Montenegro, Escocia, Catalunya y “o proceso de descolonización” de Nueva Caledonia.

En clau interna corsa, o FLNC tamién chustifica a suya decisión por o feito que, seguntes a suya visión, se ye producindo un cambeo historico en a politica corsa. A organización armada considera positivo que l’Asambleya de Corcega haiga feito trangos -historicament reivindicaus por l’independentismo- pa reclamar en París a cooficialidat d’a luenga, a revisión d’a Constitución y a creación d’un estatuto de resident, que o FLNC qualifica de “primer acto de reconoixencia d’a nacionalidat corsa“. Ye en iste contexto, sumau a o cheneral d’atras nacions sin estau d’Europa, que o FLNC veye a oportunidat de defender a independencia por a vía exclusivament politica.

Fuent: http://www.nationalia.cat/ca/noticies/1915

Una rispuesta a O FLNC deixa as armas pa que Corcega se sume a la “fase de conquista politica” d’os “movimientos chermans”

  1. Pingback: O FLNC deixa as armas pa que Corcega se sume a la “fase de conquista politica” d’os “movimientos chermans” » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.