O Foro Palestina Libre convoca una concentración en Zaragoza en refirme a o pueblo palestino

O exercito israelí contina a suya ofensiva en Gaza. Iste chous o Foro Palestina Libre de Zaragoza ha convocau una concentración en refirme a o pueblo palestino

Nino en enronas de Gaza en 2009 (Foto: Andreas H. Lunde)

Nino en enronas de Gaza en 2009 (Foto: Andreas H. Lunde)

O exercito d’Israel ha bombardiau en a pasada maitinada mas de 50 obchectivos en a Francha de Gaza, horas dimpués d’anunciar o empecipie d’a operación ‘Marguin Protectoracontra Hamas en o enclave palestino, en bell medio de l’incremento d’as tensions en a zona.

Seguntes replega Naiz, l’achencia palestina de noticias Maan ha indicau que un total de catorce palestinos han resultau nafraus a conseqüencia d’os bombardeus d’ista maitinada, si bien o balance podría aumentar, ya que quantas viviendas han quedau de tot estrafalladas por os ataques.

“O exercito ha prencipiau a operación ‘Marguin Protectora’ en Gaza contra Hamás ta meter fin a o terrorismo a o que fan frent totz os diyas os ciudadanos israelís”, ha indicau a traviés d’a suya cuenta oficial en o ret social Twitter (@IDFSpokesperson). “O exercito responderá con fuerza debant de qualsiquier menaza y ferá tot o que sía en o suyo poder ta protecher a Israel d’o terrorismo. Debe detener-se”, ha adhibiu en un segundo tuit.

Concentración en Zaragoza en refirme a o pueblo palestino

O Foro Palestina Libre (FPL) ha convocau iste chous, 10 de chuliol, a las 20.00 horas en a plaza d’Espanya una concentración urchent en emparo a o pueblo palestino.

En un comunicau, o FPL recorda que “qualques dotzenas de personas ha estau asasinadas en a Palestina ocupada entre os zaguers diyas. Mas de 2.000 viviendas palestinas ha estau invadidas y arrasadas. Decenas de casas fuoron espaldadas. Siguen os bombardeus sobre Gaza. Continan os asesinatos. Uns 600 palestinos ha estau seqüestraus en dos semanas, beluns d’ells tornaus t’as garcholas que plegaban d’albandonar, ta compensar os efectos d’a recient liberación de presos sobre l’audiencia y l’electorau sionista. I hai mas de 6.000 personas enzarradas ilegalment en prisions israelís. Millons sigue asperando a suya liberación d’a ocupación, amparadas por o mesmo dreito que os gubiernos d’ixa banda anomenan ‘Comunidat Internacional’ han convertiu en vasuera”.

Seguntes o pareixer d’o FPL “tot ixo contrimuestra que os primers intresaus en alimentar a violencia son os suyos fundadors”. “Ista vegada -anyaden- a sincusa ha estau a desaparición y muerte de 3 colonos. Le clamamos ‘sincusa’ porque asinas ye como actúan os gubiernos israelís: matando u deixando morir, quanta mas sangre millor, a vegadas mesmo a propia, si cal ta ganar o emparo d’os suyos”.

“L’hemos denunciau mil vegadas: negar a humanidat a os palestinos no ye solament racismo. Ye una necesidat politica d’o sionismo, porque reconoixer os suyos dreitos obligaría a Israel a qüestionar a historia d’o suyo Estau”, afirma o comunicau.

Amás, o Foro Palestina Libre recorda a importancia d’a campanya de “boicot, desinversions y sancions”, porque ye “o medio mas eficaz a o nuestro alcance ta treballar contra 70 anyos de chenocidio, 70 anyos de crimen sistematico tolerau y emparau por o Estau espanyol, entre muitos atros. Y porque ya ha contrimostrau a suya eficacia en numerosas ocasions”. “A nuestra obligación, a nuestra responsabilidat, ye denunciar y empachar qualsiquier traza de colaboración con iste chenocidio. Nomás fa falta seguir treballando, refirmar a campanya, espardir-la, seguir, seguir, creixer en numero, dica ganar. Ixe ye o nuestro deber, aquí y agora. Por solidaridat, por dignidat, por chusticia, por fastio, por rabia y por vergüenya, tos convidamos a participar en ista causa chusta, legal, lechitima y necesaria”, concluyen.

Fuent: http://arainfo.org/2014/07/el-foro-palestina-libre-convoca-una-concentracion-en-zaragoza-en-apoyo-al-pueblo-palestino/

Una rispuesta a O Foro Palestina Libre convoca una concentración en Zaragoza en refirme a o pueblo palestino

  1. A comunidade internacional tem de um basta ao sionismo. Os maiores prejudicados da ideologia sionista
    são os próprios judeus do mundo inteiro. É preciso que os judeus se unam contra esta matança.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.