O “Foro Publico 100%” reclama en as carreras de Zaragoza “prioridat t’o gasto social antes que t’os bancos”

Unas 1.500 personas marchoron en Zaragoza reclamando priorizar o gasto en afers socials y denunciando privatizacions y retalles

Foto: CGT Aragón

Foto: CGT Aragón

Una manifestación convocada por o “Foro Publico 100%” recorrió iste chueves, dende as 18.00 horas d’a tarde, as carreras d’o centro de Zaragoza reclamando que tanto o Gubierno d’Aragón como o d’o Estau espanyol priorice l’atención a las personas antes que os bancos.

A manifestación, que congregó a unas 1.500 personas, yera a fin d’a campanya que o “Foro Publico 100%” prencipió o pasau 11 de febrero contra as midas aplicadas por o Gubierno d’Aragón y por o espanyol “con as que son realizando o desmantelamiento y privatización d’os servicios publicos”. O Foro,  integrau por CGT, STEA-i, CATA, OSTA, SF-i, Intersindical d’Aragón (IA), IU, CHA, MHUEL, FABZ, Marea Narancha, Marea Blanca y Marea verda, se constituyó en esfensa d’os Servicios Publicos y contra as privatizacions y concertacions, y tamién ta refusar as politicas d’o PP-PAR en Educación, en Sanidat, en a Universidat, y contra as midas d’o PSOE en os transportes publicos y os servicios municipals d’a capital d’o país, doblement afectaus, por as externalizacions y grieument atacaus por a reforma local propuesta por o gubierno de Rajoy.

“En o caso d’Aragón, dende a plataforma denunciamos que o PP, con l’emparo d’o PAR, menaza con eliminar duplicidatz, quan o que quieren ye desmantelar y privatizar os servicios publicos y, en l’ambito municipal, quieren reducir drasticament as  competencias d’os concellos en materia de servicios socials”, denunciaban as organizacions convocants.

A luita de FCC Parques y Chardins present en a manifestación

A plantilla de FCC Parques y Chardins, contracta municipal que o Concello de Zaragoza tien externalizada, formaba un bloque propio dentro d’a manifestación ta unir a suya luita a las d’a resta de participants. Estió iste mierques quan se conoixió a decisión unilateral d’a interpresa FCC de baixar os salarios un 21% y aplicar diferents retalles socials y laborals a la plantilla, qüestión que motivó a convocatoria de vaga indefinida.

Stop Desafiuzamientos Zaragoza tamién s’unió a o corteixo reivindicativo

Un centenar d’activistas de Stop Desafiuzamientos Zaragoza tamién s’integró en a manifestación dimpués d’haber compliu l’obchectivo en a suya acción protesta celebrada menutos antes. Dimpués de ‘ocupar’ temporalment una oficina de Caja Duero aconsiguioron rancar a os directivos d’ista entidat un compromís ta mantener una reunión an que negociar condicions menos onerosas d’as actuals ta personas afectadas por l’abuso hipotecario.

Todas as luitas unidas contra as politicas “antipersonas”

Con os distintos grupos d’activistas que s’heban iu sumando entre o recorriu d’a manifestación, ista alcanzó o final d’o suyo recorriu en a plaza d’o Pilar a on se dio lectura a un manifiesto.

“O Foro Publico 100 % hemos convocau una vegada mas a la ciudadanía, ta manifestar o nuestro total refuse a la politica de privatizacions que se ye realizando dende fa tiempo y que agora se ye accelerando, destruindo y desmantelando totz os servicios publicos. Cheneracions d’aragoneses y aragonesas han treballau duro ta creyar infrastructuras esencials, ta empentar sectors estratechicos u ta creyar organismos que suministrasen servicios basicos. Con a sincusa d’o mandato europeu y d’a suposada eficiencia d’o sector privau, os succesivos gubiernos d’o PSOE y d’o PP han iu vendendo o patrimonio acumulau. Multitut d’interpresas han pasau a mans de multinacionals y amigotz d’o politico de turno”, denunciaban.

“Se privatizan grans interpresas que son en o esmo de totz. Pero tamién servicios locals, que s’externalizan por medio de contractas, como a limpieza y chardinería, a replegada de vasueras u o transporte urbano. As conseqüencias son: a perda de puestos de treballo. Os treballadors que i quedan tienen piors condicions y a ciudadanía recibimos piors servicios y pagamos tarifas mas altas. En Sanidat prencipioron privatizando cocinas, limpieza y lavandería. Siguen con prebas diagnosticas, con os laboratorios  y cirurchía menor. Agora van a por l’atención hospitalaria, a por os centros d’especialidatz y os d’atención primaria, transferindo recursos publicos a o control privau en contractos que nos comprometen por cheneracions. Si lo permitimos, solament podrán acceder a la sanidat, os que tiengan diners ta pagar”, adhibiban.

Asinas mesmo, recalcaban que “en a Educación asistimos a un desmantelamiento programau d’a Escuela Publica, de vez que se privilechia a os centros concertaus y se realizan nuevos conciertos. A Universidat no ye una excepción. A la expansión d’as universidatz privadas como a universidat San Chorche, se le une o deterioro financiero d’a publica y o refirme privau d’a investigación. A creyación de masters d’alto pre, a puyada de taxas y a reducción de becas fa cada vegada mas dificil l’acceso a la ensinyanza universitaria a os estudiants procedents d’a clase obrera”.

“As pensions publicas levan muito tiempo en o punto de gollada d’a banca. Reducindo prestacions y cambiando o fondo d’o sistema se ye parando o camín t’o reemplazo gradual d’o sistema publico de pensions por un privau”, explicaban con asprura.

Antiparte, aludiban a os servicios municipals y socials que “han sufierto a perda de mas de 800 puestos de treballo dende o 2008, amás d’una diminución de recursos economicos, o que significa que determinaus servicios no se puedan amprar en condicions por falta de plantilla y de diners, en un momento en que a crisi economica, como causa conchuntural y un sistema social inchusto, han provocau que aumente a situación de precariedat de millars de familias que solicitan emparo. No podemos seguir por ixe camín. O dreito a la educación, a la sanidat, a la vivienda, a o transporte, a la seguridat en a viellera, a os cudiaus en a dependencia, a uns servicios municipals de calidat, no pueden depender d’os recursos individuals, ni estar a o servicio d’o esquimen economico”.

“A privatización de totz istos servicios, l’incremento de l’ature, os retalles de retribucions que pretenden deixar os nuestros chornals entre 400 y 600 euros mensuals chunto a o grau retalle de dreitos civils y libertatz, nos levan a la mas pura y dura esclavitut, sin cadenas, pero immobilizaus. Exichimos que a prioridat d’os presupuestos sían os gastos socials y no o pago d’una deuda ilechitima a os bancos”, concluiban.

Vidio d’a manifestación.

Fuent: http://arainfo.org/2014/02/el-foro-publico-100-reclamo-ayer-en-las-calles-de-zaragoza-prioridad-para-el-gasto-social-antes-que-para-los-bancos/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.