O Foro sobre o río Alcherez deixa claro que existen alternativas viables a o entibo d’Auguaviva

Expiertos d'universidatz, tecnicos y miembros d'a CHE, afectaus y plataformas vecinals participoron en iste foro arredol d'o entibo d'Auguaviva

Foto: Plataforma "El Bergantes no se toca"

Foto: Plataforma “El Bergantes no se toca”

O pasau sabado se celebró en Alcanyiz o Foro Tecnico y Ciudadano sobre o río Alcherez (Bergantes en castellano y catalán), organizau por a Fundación Nueva Cultura de l’Augua con a colaboración d’a Plataforma “El Bergantes no se toca”, y a la que acudioron unas 40 personas entre expiertos de diversas universidatz, personal d’a Confederación Hidrografica de l’Ebro, afectaus y achents socials d’o territorio.

En una nota de prensa, a Plataforma sinyala que o president d’a Confederación, Xavier de Pedro, ubrió o debat presentando o prochecto d’o entibo d’Auguaviva, “mantenendo o suyo discurso ya habitual en que explicó os motivos d’a CHE t’a construcción d’o entibo d’Auguaviva”. “Posteriorment -contina la nota-, os diferents expiertos prencipioron a explicar as distintas alternativas existents a ixe prochecto, centradas en a intervención en o propio entibo de Calanda, orichen d’a problematica en qüestión, y tamién en a ordinación d’o territorio y a chestión d’os flumens, actuacions istas zagueras que nian han estau tenidas en cuenta por l’organismo de cuenca”.

“Asinas pues, as posibles actuacions en o entibo de Calanda pasarían por executar uns nuevos aliviaders que permitisen un mayor desaugüe u por una solución mixta de recreiximiento d’o entibo y ixampe d’aliviaders”, sinyala a Plataforma. Istas solucions “se complementarían con atras no estructurals, basadas en ordinación d’o territorio y recuperación d’o Dominio Publico Hidraulico, mas que mas en o Guadalope, que permitisen una laminación natural d’os flumens, y tamién d’una chestión adequada d’a cuenca en caso de creixidas, bella cosa que no se fació en a creixida de l’anyo 2.000, como se contrimostró con datos en o debat”. Todas istas solucions, “viables y mas sostenibles, paliarían l’actual vulnerabilidat d’o entibo de Calanda, sin un impacto tant enorme en o territorio y salvaguardando a seguranza d’os lugars auguas abaixo, un aspecto fundamental ta totz os presents”. Un dato muit ilustrativo que s’aportó estió que o entibo d’Auguaviva, con uns 160 anyos de vida util estimada, tendría tasament un 1,6% de probabilidatz d’actuar contra o flumen de retorno 10.000 anyos, o qual “contrimuestra clarament a suya incapabilidat ta solucionar iste problema”.

Dende o punto de vista churidico, a Plataforma remarca que se fació enfasis en que, “seguntes a Directiva Marco de l’Augua, a vulneración d’a protección ambiental d’o río Alcherez, declarau como LIC, ye incompatible si existen alternativas viables sin ixe impacto sobre o medio natural, como ye iste caso. Europa podría bloquiar pus tanto a financiación como a construcción d’o entibo d’Auguaviva”.

D’igual traza se contrimostroron as grans deficiencias que presienta o prochecto d’o entibo en l’Alcherez en quantos capitols, “especialment en o estudeo d’alternativas, en que no s’estudean adequadament atras actuacions, que quedan descartadas sin chustificación u nian i amaneixen, y en o calculo de cabals d’as creixidas, os quals son de raso sobredimensionaus”.

Tanto tecnicos como achents socials metioron sobre a mesa atras qüestions de caracter mas social, “imprescindibles en ista situación”, como son a participación y o consenso, “dos aspectos que no s’han promoviu dende a CHE, que ha veniu actuando como un ‘rodillo’ con os afectaus”, asevera a Plataforma. “En o Foro se contrimostró que ista mena de debatz son de muita utilidat, y s’encomendó a que no estase una experiencia puntual sino que se convierta en o mecanismo de dialogo entre todas as partes en busca d’ixe necesario consenso, prebando d’imitar a experiencia pionera y modelica d’o río Matarranya”, apostillan.

Dende a Plataforma “El Bergantes no se toca” se fa una valoración mas que positiva d’os resultaus d’o Foro, ya que “quedó contrimostrau que os argumentos que s’han esfendiu dende o prencipio por as y os vecins d’o territorio son de tot ciertos, por o que a sensación ye d’estar cargaus d’animo y (encara mas) cargaus de razons debant d’iste conflicto”. Amás, s’exiche a la Confederación a paralización d’o proceso de tramitación d’o prochecto d’o entibo d’Auguaviva dica que exista consenso scientifico-tecnico y social sobre l’actuación a desembolicar, mantenendo os cauces de dialogo, y se pide que “se deixe de creyar una alarma social de tot irreal y d’infundir espanto a la población con tendenciosas declaracions publicas”.

Fuent: http://arainfo.org/2014/02/el-foro-sobre-el-rio-bergantes-deja-patente-que-existen-alternativas-viables-a-la-presa-de-aguaviva/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.