O fuego d’Andilla no s’atura

Fabra da por 'practicament estabilizaus' totz dos incendios. O de Cortes de Pallars s'estabiliza

O president d’a Generalitat, Alberto Fabra, ha asegurau que os incendios que asolan o País Valenciano dende o chueves se troban ‘practicament estabilizaus’. Pero, si bien o de Cortes de Pallás (Val d’Aiora) ha dentrau en fase de control, y diferents fuents aseguran que ya no fa flama, o d’Andilla (Serranos) contina encara descontrolau, mas que mas en os frents de Lliria y Les Alcubles. Iste ye l’incendio que menaza a sierra de Calderona, uno d’os pulmons verdes d’a zona.

A causa d’os incendios encara i hai centenars de vecins desaloixaus que no han puesto tornar ta casa. I hai mas d’un millar de personas desaloixadas y a Cruz Roya ha incrementau dica noucientas as camas disponibles, que ha distribuyiu en os aloix habilitaus en Turís, el Villar, Marines y Altura. Mas d’un centenar de voluntarios fan darias de dotze horas ta aduyar a os afectaus.

Fabra ha feito as declaracions en Iàtova (Val d’Aiora) acompanyau d’o ministro d’Agricultura espanyol, Miguel Arias Cañete, y d’o ministro d’Esfensa espanyol, Pedro Morenés. Tamién ha declarau que dende agora se treballa ta recuperar a normalidat.

A extensión cremada equivale ya a la isla d’Ibiza; as estimacions no oficials fablan d’unas cinqüenta mil hectarias cremadas, pero ni o gubierno valenciano ni l’espanyol quieren quantificar a superficie afectada.

O ministro d’Agricultura espanyol, Miguel Arias Cañete, y o d’Esfensa, Pedro Morenés, han veniu iste maitín ta Iàtova, a on ye o centro de mando d’os equipos de extinción, y s’han reuniu con Fabra. Denguno d’ells ha quiesto responder qué estimación fan d’as hectarias cremadas, y han refusau ‘especulacions inutils’.

Criticas ta reducir os fondos d’a luita contra o fuego

Compromís demandará un pleno extraordinario ta que o Consello dé explicacions ‘dimpués de retallar en prevención d’incendios ta estalbiar-se unos quantos euros’. Amás, ha demandau que no se pueda fer garra mena d’aproveitamiento privau d’a fusta ni d’os recursos d’a zona cremada.

‘O cambeo que s’introdució en a lechislación valenciana, que criticamos durament y que estableixeba a posibilidat de l’aproveitamiento privau d’as zonas cremadas ye una aberración, ya que s’eliminan as midas disuasorias’, diz a portavoz adchunta, Mònica Oltra.

Por a suya parte, o diputau d’EUPV, Lluís Torró, critica a politica ‘irresponsable’ d’o gubierno valenciano en materia de prevención y extinción d’incendios. En un comunicau, amuestra a suya preocupación y demanda a o consellero de Gubernación, Serafín Castellano, que corricha y aumente os recursos y meyos ta evitar mas esferras como ista. ‘Isto se veyeba venir –diz– son dos anyos de retalles’. Por ixo EUPV exiche a o gubierno que aumente os recursos, meyos y personal adedicaus a la prevención y a extinción d’incendios y ha demandau a comparecencia d’o consellero en as Cortz ta que dé explicacions.

O secretaire cheneral d’o PSPV, Ximo Puig, lamentó ahiere a trachedia pero descartó de fer garra critica politica, si bien remeraba que ista no heba estau ‘a postura d’o PP quan yera en a oposición repective a os incendios de 1994’, y concluyó: ‘Ya i habrá tiempo d’analisar o que ha pasau’.

Un deteniu por o fuego d’Andilla

A guardia civil detenió ahiere a un hombre de 57 anyos como presunto autor d’o fuego d’Andilla. L’acusan d’imprudencia, por haber cremau unos restollos en una finca particular. Hue o deteniu pasará a disposición chudicial en o chudgau de guardia de Lliria.

Fuent: http://www.vilaweb.cat/noticia/4025365/20120702/foc-dandilla-satura.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.