O fuego de l’Empordà puede entrar en fase de control hue de maitins u meyodía

Os achents troban centenars de colillas a on prencipió l'incendio d'a Jonquera. Se recomienda a os vecins mas amán d'o fuego que no salgan d'o nuclio urbano

L’incendio de l’Alt Empordà, con quatro muertos y una vintena de ferius, contina activo. Pero hue o consellero d’Interior, Felip Puig, confita en que empecipien a controlar-lo de maitins u de meyodía. O flanco oriental ya ye practicament estabilizau y l’occidental, entre os termins d’Agullana, Boadella, Darnius y Terrades, encara ye prou activo. A superficie afectada ye de 13.800 hectarias.

A humedat relativa ha puyau, a temperatura no ye tan alta y l’aire ha amainau. ‘Isto habría de permitir atacar y perimetrar o fuego y progresar en a contención de totz os frents’, ha dito Puig. Ya que l’aire s’ha calmau tanto, o fumo no se mueve, por ixo aumentará a sensación de mala ulor de fumo a os municipios mas amán d’o fuego. O consellero ha recomendau a totz qui tiengan dificultatz respiratorias, y a la chent mayor, que se mueva poco.

Ya no i hai orden de confinamiento, pero sí que recomiendan a la chent de Cantallops, Darnius, Terrades, la Vajol, Agullana, Sant Llorenç de la Muga y Albanyà que no salgan d’o lugar si no ye indispensable. Tampoco no i hai carreteras talladas, fueras de quatro locals, entre Darnius, Terrades y Llers, ta facilitar o relevo d’os equipos que amortan o fuego.

Agora treballan sobre o terreno uns 1.200 achents, entre bomberos, militars, forestals, voluntarios y mossos. Tamién i treballan bombers ninviaus por o gubierno espanyol y por o gubierno andorrano, y meyos aerios de la Generalitat, d’o estau espanyol, de qualques gubiernos autonomicos y d’o estau francés.

A causa d’os incendios: una colilla enchegada

A causa d’o fuego que s’enchegó en a Jonquera o domingo estió una colilla enchegada, seguntes ha confirmau a consellería. Amás, Felip Puig ha dito que os achents rurals heban trobau centenars de colillas en o puesto a on pareixe que empecipió l’incendio.

Tanto l’orichen d’o gran incendio d’a Jonquera, que encara crema, como o de Portbou, ya controlau, estioron a ran de carretera. Seguntes Felip Puig, o fuego d’a Jonquera empecipió chunto a l’aparcadero de cambions que n’i hai en a N-II d’o Pertús; y en Portbou, a ran d’a N-260. Puig ya heba apuntau que os incendios heban estau debius a neglichencias, por mas que no descartó que estasen intencionaus.

Quatro muertos y una vintena de ferius

O fuego ha causau quatro muertos: un hombre y a suya filla, que se tiroron d’alto ta baixo d’una cingla quan o fuego de Portbou los enrestiba; un vecín de Figueres que tenió un ataque de corazón, y un ciudadano francés atrapau por o fuego y que estió ingresau con o 80% d’o cuerpo cremau.

Amás, encara i hai ingresaus ueito ferius en a Val d’Hebrón y en o Hespital Josep Trueta. Y o consellero Puig fació saber que i heba una vintena de ferius que s’heban tirau d’alto ta baixo d’una cingla en veyer-se rodiaus por o fuego en a N-260.

Bellas poblacions habilitoron os poliesportivos ta aloixar-ie a la chent que no podió plegar en casa u estió evacuada u no podió pasar a l’atra banda de l’Albera.

Evacuaus d’acampadas y casas de colonias

Muitos ninos que feban colonias istos días en a zona afectada por l’incendio, habioron de salir. A mayoría pasoron a nueit en os centros civicos d’as poblacions d’a ribera. Totz son a salvo.

O domingo s’evacuoron, por prevención, dos campings d’Albanyà y un de Sant Llorenç de la Muga.

Restableixiu o suministro electrico a la mayoría d’afectaus

L’incendio tamién afectó o ret electrico, y ahiere, entre una buena parte d’o día, uns 3.900 abonaus no tenioron luz. Seguntes o consellero Puig, agora nomás n’i hai 60.

Carreteras talladas por o fuego

L’incendio de l’Alt Empordà obligó a tallar diez carreteras comarcals. Concretament, a GIV-5041 en o Pont de Molins, a GIV-5044 en Biure, a GI-602 en Sant Climent Sescebes y a GI-502 en Darnius.

Ahiere de maitins encara i heba talladas a GIP-5101 entre Avinyonet de Puigventós y Terrades, a GIV-5105 entre Llers y Avinyonet de Puigventós, a GI-500 entre Agullana y a Jonquera, a GI-501 entre Agullana y a Vajol, a GI-504 entre Terrades y Agullana y a GI-610 en Vilajuïga.

L’autopista AP-7 ya s’ubrió a o transito en totz dos sentius ahiere en o mesmo maitín. Igual que o servicio de cercanías de Renfe, pero no a linia d’o TGV.

Fuent: http://www.vilaweb.cat/noticia/4030233/20120724/puig-confia-comencar-controlar-foc-mati.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.