O grupo de vivienda d’o 15M de Uesca aconsigue a dación en pago en o caso de Blanca

Blanca Sinchiguano y a suya familia han aconsiguiu que o Banco Santander les dé a dación en pago, dimpués d'estar feita fuera d'a suya vivienda

Foto: 15M Uesca

Foto: 15M Uesca

O grupo de vivienda d’o 15M de Uesca ha aconseguiu a dación en pago en o caso de Blanca Sinchiguano. Iste martes, 29 d’octubre -dimpués de nueu meses de protestas y negociacions debant d’o Banco de Santander, que chestionó a hipoteca, y a financiera UCI- s’ha sinyau en Uesca l’alcuerdo que permitirá a la familia de Blanca de prencipiar de nuevas sin tener una deuda permanent dimpués de perder a vivienda. Ye a segunda dación en pago que zarra en a capital uescana iste colectivo ciudadano que se moviliza por o dreito a la vivienda.

“Ye claro que a denuncia y presión han dau o suyo fruito”, sinyalan dende o grupo de vivienda d’o 15M. “L’obchectivo que nos proposemos fa un anyo s’ha compliu: hemos sinyau o documento de dación en pago t’a hipoteca de Blanca”. Asinas lo narra una d’as personas que ha participau asiduament en as iniciativas de solidaridat con Blanca y as suyas fillas: “Si recordatz o pasau mes de febrero se colocoron mesas informativas en a plaza Concepción Arenal, debant d’o banco Santander, totz os maitins un par d’horas. Dende alavez estió quan ista entidat financiera empecipió a fer-nos caso. Se metió en contacto con UCI (Unión de Credito Immobiliario) y dimpués de meses y meses de negociación, pedindo y pedindo papels, por fin o martes, 29 d’octubre, se sinyó a dación en pago”.

Dende o grupo de vivienda d’o 15M de Uesca manifiestan que a dación en pago no ye una solución, pero a lo menos ye una salida y un prencipiar dende zero ta Blanca y as suyas fillas. “Queremos agradeixer enormement l’emparo de todas ixas personas que s’han iu pasando por as mesas informativas, por as asambleas y que han participau activament en o grupo de vivienda ta fer isto posible. Dezaga d’isto i hai meses de duro treballo, protestas, mesas informativas y muitismas trucadas de telefono, ya que no se podeba ir in situ a charrar con UCI, tot yera telematicament. O esfuerzo n’ha valiu a pena y aquí somos “a o piet d’o canyón” ta luitar con proximas entidatz financieras” adhiben.

“Somos conscients que n’i hai muitos casos mas. I hai muitas familias que se son quedando sin casa dimpués d’haber iu pagando con apuros mientres teneban un treballo, a perda d’o qual les ha suposau no poder complir con a cantidat mensual establida. Isto ha provocau que os bancos y caixas d’estalbios, a traviés de demandas chudicials de desafiuzamiento, sían provocando un sufrimiento a la sociedat en intrés d’os suyos esquimens. En istas actuacions amuestran que o sistema financiero no’n tien de corazón, maxime quan ha estau un d’os causants fundamentals d’ista crisi” aseveran.

Seguimos y seguiremos reivindicando o refirme mutuo y o treballo colectivo, que se materializan en ista ocasión con a consecución d’a dación en pago. Y, prou que, seguiremos fendo un clamamiento a toda a sociedat ta fer fuerza común y paralizar ista inchusticia, porque somos seguras de que sí se puede”, concluyen.

Fuent: http://arainfo.org/2013/10/el-grupo-de-vivienda-del-15m-de-uesca-consigue-la-dacion-en-pago-en-el-caso-de-blanca/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.