O Gubierno aragonés apreba o nuevo Ingreso Aragonés d’Inserción

O nuevo Ingreso Aragonés d'Inserción podrá estar solicitau por personas esqueferadas que haigan acotolau todas as prestacions y subsidios

Foto: Gubierno d'Aragón

Foto: Gubierno d’Aragón

En o Consello de Gubierno de hue martes 18, o executivo de Luisa F. Rudi ha aprebau o prochecto de Lei d’o Ingreso Aragonés d’Inserción. Iste ingreso permitirá, como novedat, que as personas esqueferadas que haigan acotolau as suyas prestacions y subsidios d’ature puedan acceder a ista aduya.

Ricardo Oliván, consellero de Sanidat, Bienestar Social y Familia d’o executivo aragonés, ha explanicau que ista futura lei tien l’obchectivo d’adaptar-se a la realidat socioeconomica aragonesa. O consellero ha declarau que “i hai colectivos que no son excluius socialment, sino laboralment, que requieren d’una renta pa atender as suyas necesidatz basicas mientres miran una alternativa d’emplego”.

Con iste esprito, o nuevo IAI tendrá dos itinerarios: a inserción social y a inserción laboral, asinas que agora podrá estar cobrau por personas que haigan perdiu o suyo treballo y no puedan acceder a prestacions u subsidios d’ature, colectivo que no podeba acceder-ie con a encara actual normativa, aprebada en 1993.

Seguntes o consellero Oliván, atro d’os obchectivos d’ista lei ye equiparar a normativa con as normativas d’as comunidatz vecinas, pa privar un posible “efecto clamada”. A quantía d’a prestación irá entre 441 euros y 621,26 euros cada mes.

Os beneficiarios habrán de tener entre 25 y 65 anyos, amás d’estar a lo menos dos anyos empadronau y con residencia legal en Aragón, extranchers bi incluius. Manimenos, ista exichencia no s’aplicará en o caso de mullers victimas de violencia de chenero, personas en acullida familiar u que procedan d’institucions de protección de menors.

I habrá un control exhaustivo mientres tot o proceso, tanto en a solicitut como en o seguimiento d’o perceptor u perceptora d’o IAI. A nueva norma viedará exercer a mendicidat a os beneficiarios d’a prestación, asinas como a obligación de no refusar garra treballo ufierto, encara que podría interpretar-se, seguntes l’administración, bella ufierta imposible d’acceptar.

Oliván destaca l’aumento presupuestario, que pasa de 6,5 millons d’euros en 2011 a 28 millons pa 2014, remarcando que o Gubierno aragonés fa una “apuesta clara” pa atender as necesidatz basicas d’as personas necesitadas.

Una rispuesta a O Gubierno aragonés apreba o nuevo Ingreso Aragonés d’Inserción

  1. Pingback: Luquin: “Oliván, con sus medidas, pone bajo la lupa de la sospecha a las personas en situaciones muy vulnerables” | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.