O Gubierno d’Aragón anuncia un incremento de 177 millons en a suya aportación a lo Programa de Desenrollamiento Rural 2014–2020

L'alcuerdo entre o Executivo aragonés, as organizacions agrarias y a federación de cooperativas s'orienta a o desenrollamiento de l'agroindustria

Foto: Gubierno d'Aragón

Foto: Gubierno d’Aragón

O Gubierno d’Aragón ha anunciau un incremento de 177 millons d’euros en a suya aportación a o Programa de Desenrollamiento Rural 2014–2020, respective a la cantidat inicialment prevista, de 179 millons. Parando cuenta en que l’aportación d’a Unión Europea en o caso d’Aragón ha aumentau licherament dica situar-se en 466,8 millons d’euros, o presupuesto final con o que contará o programa rondará os 900 millons d’euros.

O consellero d’Agricultura, Ganadería y Medio Ambient, Modesto Lobón, aseguró ahiere que “o Gubierno d’Aragón ye dispuesto fer un esfuerzo y se compromete a plegar en a mesma cantidat que se plegó en o periodo anterior, a la marguin d’a dotación d’o Gubierno espanyol, ixo sí, condicionau a que o suyo conteniu responda fundamentalment a un desenrollamiento estratechico de l’agroindustria en Aragón y a qüestions como fer mas choven o campo aragonés”. 

Iste estió l’alcuerdo aconseguiu ahiere entre a Consellería d’Agricultura, Ganadería y Medio Ambient, as Organizacions Profesionals Agrarias y a Federación Aragonesa de Cooperativas Agrarias, dimpués de celebrar una nueva trobada pa negociar os termins quantitativos y qualitativos que rechirán o nuevo Programa de Desenrollamiento Rural d’Aragón.

Agora queda emplir o programa de conteniu con a premisa y condición que o consellero sinyaló, “condicionar-lo substancialment a qüestions que aconsigan un desenrollamiento estratechico de l’agroindustria en a Comunidat”. Qüestions que, tal como metió de manifiesto Lobón, habrán de replegar en a propuesta que as OPAS y a FACA elaboren, pa aconseguir un alcuerdo final que chunte os intreses de totz y aconsigan o desenrollamiento y empente que mereixe o sector.

As organizacions sindicals y as cooperativas amostroron satisfacción dimpués d’haber aconseguiu dito alcuerdo, reconoixendo o esfuerzo d’a Consellería, en destinar a dotación presupuestaria necesaria pa no perder fondos europeus y satisfer as necesidatz d’o sector.

Fuent: http://www.cronicadearagon.es/wordpress/?p=47957

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.