O Gubierno d’Aragón detalla un plan de reactivación economica

A intención de l'Executivo de Luisa Fernanda Rudi ye rematar con l'aumento de l'ature en Aragón y tornar t'a senda d'o creiximiento

bonoDimpués d’o “disgusto” que suposó t’o Gubierno d’Aragón os datos d’a zaguera Enqüesta de Población Activa (EPA), datos que l’Executivo asegura no entender, os responsables d’Economía s’han meso “mans a la obra” ta dar a luz un plan de midas directas de reactivación economica, que en primeras veyería a luz en as venients semanas. Asinas l’ha asegurau Francisco Bono, consellero d’Economía de l’Executivo aragonés, que tamién ha advertiu que dito plan economico no dará “fruitos aintro de dos meses”.

En una comparecencia aintro d’as Cortz d’Aragón, o responsable d’o departamento economico ha asegurau que iste plan de reactivación economica ye posible realizar-lo en o momento actual gracias a o “relaixo presupuestario” que suposa a flexibilización prevista d’o deficit. “Nos heban ligau a soga a o cuello”, ha reflexionau a iste respecto o consellero.

O plan ta reactivar a economía d’Aragón se presentará “en breu”, encara que caldrá asperar ta veyer os suyos resultaus. Tot ixo con a intención de fer ixublidar “os retalles y os teitos de deficit”, dos elementos que no rematan de fer goyo a Bono, seguntes ha comentau en ista comparecencia.

EPA
En ista zaguera Comisión d’Economía y Emplego yera imposible que dengún d’os grupos presents fese referencia a os trachicos numers que l’ature ha deixau en Aragón. Tot y que as estadisticas son as que son, o Gubierno d’Aragón leva bells días asegurando que no troban razons ta guarismos tant negativos. Os zaguers datos amuestran un incremento de 22.200 aturaus en Aragón ta aconseguir a cifra global de 144.000, seguntes l’Instituto Nacional d’Estatistica (INE).

A iste respecto, Bono ha insistiu en que os datos de l’INE no tienen cosa a veyer con “os indicadors” que tiene dencima d’a mesa y que, por o que pareixe, son refutaus por o Servicio Aragonés d’Estatistica. Como yera d’asperar, o consellero d’Economía ha recibiu bells ataques d’a oposición, que le recrimina no fer brenca ta luitar con o desemplego. A ista qüestión, Bono ha sinyalau que tampoco no veye “cosa nueva” por parte de ditos grupos politicos.

Fuent: http://www.aragon2.net/n-20820-503-Gobierno_Aragon_detalla_plan_reactivacion_economica

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.