O Gubierno d’Aragón iniciará o proceso pa trigar una grafía común pa l’aragonés

Tres lingüistas de talla internacional designaus por CFA, SLA y EFA realizarían una grafía común que metería fin a las luitas graficas d'a luenga aragonesa

Manifestación por a igualdat d'as luengas en l'anyo 2009

Manifestación por a igualdat d’as luengas en l’anyo 2009

Dende a Dirección Cheneral de Politica Lingüistica dirichida por José Ignacio López Susín quiere fer-se un primer paso pa trigar una grafía común y oficial pa la luenga aragonesa.

Pa ixo, dende iste departamento gubernamental, han contactau con as tres asociacions principals embrecadas en l’actual luita grafica y de normativización d’a luenga, Consello d’a Fabla Aragonesa, Sociedat de Lingüistica Aragonesa y Estudio de Filolochía Aragonesa.

O proceso encomenzará con a designación de cinco filologos especialistas de talla internacional en “codificación y estandarización d’as luengas romanicas” por parte de cadaguna d’as asociacions. D’istos 15 especialistas se’n trigará nomás tres, que serán qui haigan de fer ista nueva grafía. A suya decisión tendrá caracter vinculant, y d’ista forma, saldrá a primer grafía oficial de l’aragonés en tiempos modernos.

A Sociedat de Lingüistica Aragonesa ha emitiu un comunicau en que accepta a proposición d’a Dirección Cheneral y posa bella condición como que “os tres miembros han de estar de consenso por parte d’as tres asociacions” y que “han d’estar romanistas y especialistas en ditos procesos”. Aclaran que asinas “no i habrá vencedors ni vencius”, pero tamién destacan que “no va a estar facil trobar a istos tres romanistas”, y apelan a que as quatro partes sigan a l’altura.

Dende Consello d’a Fabla Aragonesa no han emitiu encara un comunicau oficial pero han amostrau a suya satisfacción y emparo en a suya pachina de Facebook.

O Estudio de Filolochía Aragonesa debatirá iste domingo en plenario si accepta u no a propuesta d’a Dirección Cheneral de Politica Lingüistica.

Una rispuesta a O Gubierno d’Aragón iniciará o proceso pa trigar una grafía común pa l’aragonés

  1. Pingback: El Gobierno de Aragón iniciará el proceso para elegir una grafía común para el aragonés [arg]

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.