O Gubierno d’Aragón invertirá 21 millons d’euros en accions formativas ta personas esqueferadas

Se presentoron as accions formativas, presencials y de teleformación, que contarán con quasi 1.000 cursos destinaus ta unas 16.500 personas, prencipalment esqueferadas

Foto: Gubierno d'Aragón

Foto: Gubierno d’Aragón

L’Instituto Aragonés d’Emplego (INAEM), a traviés de plans de formación, realizará 977 cursos ta unas 16.500 personas, prioritariament esqueferadas. Con os cursos se pretende a inserción u reinserción d’istas personas en o sistema productivo seguntes as demandas d’o mesmo y millorando a suyas capacidatz y desarrollo personal.

Francisco Bono, consellero d’Economía y Emplego d’o Gubierno d’Aragón, y Jorge Escario, director cherent de l’INAEM, presentoron ahiere os cursos que fan parte d’o Plan de Formación t’o Emplego d’Aragón, con 753 cursos presencials ta unas 10.500 personas y 204 cursos de teleformación t’as zonas rurals ta unas 6.000 personas.

Con 21 millons d’euros de presupuesto, s’incrementan os fondos destinaus a istas accions de formación, que en 2012 contoron con 17,8 millons d’euros. As accions formativas se componen de cinco programas: Programa cheneral, de chovens, d’idiomas, ta mullers u ta personas esqueferadas de larga duración. Por un regular, istos programas cuentan con un minimo d’inscritos esqueferaus d’un 70% y d’un 30% de treballadors ocupaus.

As accions formativas presencials durarán ent’o 31 de chulio de 2014, y a teleformación ent’o 30 de chunio. Ta apuntar-se-ie, puede fer-se a traviés d’a web de l’INAEM, a traviés d’as entidatz que desarrollan ditas accions u en as propias oficinas de l’INAEM.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.