O Gubierno d’Aragón presenta o presupuesto ta 2013

O gubierno aragonés ha presentau os presupuestos ta l'anyo 2013 en Aragón. 478 millons menos (un 9,45%) tendrá o gubierno aragonés, que los considera como "socials"

Entrega d’o prochecto de presupuestos ta 2013 en as Cortz. Foto: Cortz d’Aragón

O Gubierno d’Aragón presentó o presupuesto ta l’anyo 2013. Uns presupuestos que han habiu de “pleitiar” con o “teito de gasto” que apreboron PP y PAR o pasau verano. En o prochecto, que encara habrá de pasar por l’aprebación d’as Cortz aragonesas, i habrá 4.587 millons d’euros, a os que cal sumar gastos financiers ta amortizar deuda, con o que o presupuesto total queda en 5.107,2 millons d’euros. En total de 478 millons menos (un 9,45%). Seguntes o Gubierno, a mayoría d’o presupuesto se’n va ta politicas socials y treballo. Con istos presupuestos se pretende tamién plegar a l’obchectivo d’o 0,7% de deficit en o venient 2013. Por primera vegada o prochecto de presupuestos ye accesible via web ta totz os ciudadans en http://presupuesto.aragon.es/

2.823 millons irán destinaus a politicas socials, d’os que 1.605,2 irán ta Sanidat. Ta Educación n’irán 886, en os que se cuenta a transferencia t’a Universidat de Zaragoza que se mantiene. D’a partida economica “social” 296 millons son ta protección social y 35,5 ta vivienda social. En cuanto a l’emplego, i habrá 484 millons d’euros destinaus, y 20 millons d’euros t’as redoladas.

Respective a os ingresos, que baixan un 4,16%, a mayoría viene d’o sistema de financiación autonomica estatal.

Dende o PP, Antonio Torres, los ha considerau “realistas” y “socials”, pues o gasto social representa un 61%. Destaca que son orientaus tamién a creyar puestos de treballo y que se cumplirá l’obchectivo d’o deficit. Ha criticau a la oposición ya que considera que “no i presentan garra alternativa”.

Alfredo Boné, portavoz d’o PAR, considera os presupuestos “duros” y considera que i hai marguin ta amillorar-los, mas que mas t’as personas desfavoreixidas. Considera que cal favoreixer a competitividat y dar facilidatz a la chent emprendedora.

O PSOE, a traviés d’o suyo portavoz Javier Sada, s’ha criticau a traza de presentar os presupuestos a o Parlamento, pues considera que a oposición ha estau a zaguera en conoixer-los. Manimenos, aspera a estudiar-los en profundidat ta dar-ne una opinión.

Dende IU, Adolfo Barrena considera os presupuestos como “mentirosos” y creye que aumentarán a situación de crisi. Barrena comenta que, a tamás de presentar-se como uns presupuestos socials, se retallan 200 millons en Sanidat, 130 en Educación y 54,5 en Servicios Socials. Critica l’empobrecimiento d’a ciudadanalla por a baixada d’as partidas presupuestarias socials.

Ta CHA, por meyo de Nieves Ibeas, os presupuestos plegan tardi, son “zaborrers” y a rebutir de retalles, considerando que agora “tot ye mal cubierto en istos momentos”, referindo-se mas que mas a os servicios socials, educación, sanidat y asinas-asinas. Tamién considera que Rudi “ha fracasau graument en o suyo primer anyo de gubierno”.

As collas parlamentarias ya pueden presentar as suyas esmiendas a o prochecto de presupuestos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.