O Gubierno d’Aragón promoverá o I Plan Estratechico d’Igualdat LGTB

L'Instituto Aragonés d'a Muller achuga por a educación en igualdat en o Día d'o Argüello Lesbico, Gai, Transexual y Bisexual

L’Instituto Aragonés d’a Muller (IAM), con motivo d’a celebración hue d’o Día Internacional d’o Argüello LGTB, ha emitiu una declaración institucional ta deixar patent “o respecto absoluto t’a diversidat y a profunda voluntat politica de treballar ta fer d’Aragón una tierra más igualitaria y más libre ta toda a ciudadanía”.

Seguntes ista declaración, a igualdat ye “un d’os eixes prioritarios de l’acción de gubierno” y ta fer-la real “ye fundamental incidir en a educación”, s’adhibe. Chunto a la educación, dende l’Instituto Aragonés d’a Muller s’achuga por profundizar en un marco lechislativo que reconoixca y ofreixca guarencias a gais, lesbianas, bisexuales y transexuales.

Por lo que fa a o plan estratechico, se tracta d’o primer d’istas caracteristicas que s’enchega en Aragón y establirá o compromiso de totz os ambitos competencials d’o Gubierno d’Aragón con a igualdat LGTB y con a erradicación d’a desigualdat por razón d’orientación u identidat sexual.

Contina o texto d’a declaración:

O 28 de chunio se conmemoran en totz as rechiradas de Stonewall en o Greenwich Village de Nueva York en 1969, escayecimiento que suposó a naixencia d’o movimiento de liberación gai, lesbico, transexual y bisexual (LGTB), y que se celebra internacionalment como o Día d’o Argüello LGTB. O Gubierno d’Aragón nos sumamos ta iste día de reivindicación, dende o respecto absoluto a la diversidat y a profunda voluntat politica de treballar ta fer d’Aragón una tierra mas igualitaria y mas libre ta toda a ciudadanía.

O Gubierno d’Aragón tiene a igualdat como un d’os eixes prioritarios d’a suya acción de gubierno y por ixo o nuestro compromiso con as politicas LGTB ye absoluto. Dimpués de l’aprobación d’o matrimonio igualitario, hemos de treballar ta fer real y efectiva a igualdat, y por ixo ye fundamental incidir en a educación, ta fomentar cheneracions libres de desigualdat y LGTBifobia. Asinas mesmo, creyemos necesario profundizar en un marco normativo y lechislativo que reconoixca y ofreixca guarencias a las personas gais, lesbianas, bisexuales y transexuales.

A igualdat d’as personas LGTB forma parte de l’achenda politica d’o Gubierno d’Aragón, y por ixo imos a promover l’I Plan Estratechico d’Igualdat LGTB, a traviés d’un proceso de participación ciudadana con os colectivos y asociacions de gais, lesbianas, bisexuales y transexuales. Iste plan, que ye o primer que s’enchegará en Aragón, establirá o compromiso de totz os ambitos competencials d’o Gubierno d’Aragón con a igualdat LGTB y con a erradicación d’a desigualdat por razón d’orientación u identidat sexual.

O Gubierno d’Aragón se compromete a treballar ta fer real y efectiva a igualdat de toda a ciudadanía a traviés de medidas concretas, como l’I Plan d’Igualdat LGTB, encaminadas a fomentar a igualdat y o respecto a la diversidat, y a erradicar qualsiquier manifestación de discriminación por razón d’orientación u identidat sexual.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.