O Gubierno d’Aragón publicita un concurso de curtometraches antiabortistas

A convocatoria plega en o preto d'o debat provocau por a reforma d'a lei de l'aborto que ye empenta o gubierno espanyol

Acto por a libertat d'as mullers ta decidir, o pasau 3 de chenero (Foto: Pablo Ibañez, Arainfo)

Acto por a libertat d’as mullers ta decidir, o pasau 3 de chenero (Foto: Pablo Ibañez, Arainfo)

A pachina web www.educaragon.org, portal d’o Departamento d’Educación, Universidat, Cultura y Esporte, ha publicau a convocatoria d’un concurso de curtometraches «por a vida», d’una clara tendencia antiabortista, lo que ha provocau as criticas dende muitos sectors d’a sociedat y de formacions politicas.

A convocatoria, sinyada oficialment por a «Linea de Atención a la Mujer» y a «Fundación Adopción – Vivir en familia», y endrezada ta estudiants d’entre 14 y 18 anyos, diz que «Nos cal amostrar a valor d’a vida de cada ser humano dende a suya concepción: a suya polideza y dignidat independientement d’as suya capacidatz, discapacidatz, orichen u edat» y esfiende o respeto a «la vida d’os no naixius». Entre os obchectivos tamién i ye «destacar l’important papel de l’hombre en todas istas situacions como persona imprescindible y complementaria a la muller«.

Organizacions como o PSOE, CHA u CGT ya han presentau queixas y han demandau que se sacase d’a web d’o gubierno ista publicidat. O PSOE ya ha anunciau que demandará explicacions en as Cortes. CHA opina que o concurso mira de «adoctrinar a menors en contra de l’aborto» y remera as declaracions d’a presidenta Rudi en chulio, quan dició que l’aborto «no ye un dreito d’as mullers». Dende CGT, han feito un clamamiento a los docents a no participar-ie y a «manifestar una protesta por a prebatina d’adoctrinamiento en una linia ideyolochica que ye en contra d’os dreitos y libertatz d’as mullers.»

Dende o Gubierno se’n han desmarcau decindo que «publican muitas cosas de tercers» y que ista no’n yera que «unatra más».

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.