O Gubierno d’Aragón se compromete a levar en tres anyos banda ampla de nueva cheneración a 348 localidatz y a 351 centros educativos

O Executivo ha adchudicau os treballos relacionaus con o despliegue d'ista infraestructura basica a Telefónica Espanya por 36,4 millones d'euros

Foto: Gubierno d'Aragón

Foto: Gubierno d’Aragón

Ofrir Internet d’alta velocidat a totz os ciudadanos, independientment d’o suyo puesto de residencia y fer-lo muito antes d’o que estipulan os obchectivos d’a Unión Europea t’os proximos anyos. Iste ye l’obchectivo d’o contracto de banda ampla de nueva cheneración entre o Gubierno d’Aragón y Telefónica Espanya, que han presentau iste maitín a Presidenta d’o Gubierno d’Aragón, Luisa Fernanda Rudi; o consellero d’Industria y Innovación d’o Gubierno d’Aragón, Arturo Aliaga; o president de Telefónica Espanya, Luis Miguel Gilpérez; y o director de Telefónica en Aragón, Federico Tartón.

Entre l’acto s’ha exposau l’alcance d’o contracto de colaboración publico-privada por o qual, Telefónica Espanya, interpresa adchudicataria, desplegará, explotará, mantendrá y comercializará un ret d’acceso y transporte de comunicacions electronicas con caracter d’operador mayorista. Telefónica será a que permita a operadors minoristas a prestación de servicios de banda ampla superior a 30 megabits por segundo (Mbps) en as zonas d’Aragón obchecto d’actuación, y de connexión d’internet a 50 Mbps como operador minorista en determinaus centros educativos aragoneses.

Luisa Fernanda Rudi ha asegurau que “o contracto subscrito entre o Gubierno d’Aragón y Telefónica d’Espanya suposa un fito en o proceso ta dotar d’infrastructuras a Aragón. Una relevancia a consonant d’a importancia d’os obchectivos marcaus: propiciar a ordinación territorial y o desenrollo social y economico, fer un blinco qualitativo en as infrastructuras de comunicacions, asinas como amillorar o nuestro sistema educativo. Aragón se para asinas t’os retos d’a sociedat d’a información”.

Y ye que, tal como ha asegurau Arturo Aliaga, entre os beneficiarios se troban concellos y comarcas, centros educativos y interpresas d’o sector. “A puesta en marcha d’o contracto, que s’adchudicaba o pasau mes de febrero por un importe de 36.460.930 euros (IVA incluiu), va a dotar de cobertura d’a lo menos 30 Mbps a 348 nuclios de población que suman 97.371 habitants y son ubicaus en as denominadas zonas blancas (aquellas en que no existe infrastructura de banda ampla ta guarenciar retz d’alta velocidat -30 Mbps u mas- y en que no ye previsible que garra inversor privau la construiga en un plazo de 3 anyos)”.

En os grans nuclios urbanos iste servicio ya ye disponible y s’entiende que no ye allí a on cal centrar os esfuerzos. O prochecto incluye amás a prestación d’o servicio de banda ampla de 50 Mbps a 351 centros educativos. O feito de plegar en ells tendrá un efecto multiplicador sobre as zonas obchecto d’actuación, porque 137 d’istes centros educativos son ubicaus en localidatz distintas a las 348 a on se va a desplegar o ret, asinas que en amanar-les o servicio se va a promover o desplegue d’a banda ampla en os suyos municipios.

O prochecto de banda ampla que agora ranca, cofinanciable con fondos FEDER, ha requeriu un compleixo treballo interno en que s’han estudiau dende as alternativas d’achuste dica as solucions tecnicas mas idonias. Tamién ha conllevau numerosos tramites de consultas, que han levau ista iniciativa debant d’instancias como a Comisión Nacional d’os Mercaus y a Competencia (CNMC, antiga Comisión d’o Mercau d’as Telecomunicacions), Ministerio d’Industria, Enerchía y Turismo, Dirección Cheneral d’a Competencia d’a Comisión Europea (o prochecto ha estau presentau dos vegadas en Bruselas, a on obtenió carta de conformidat en aviento de 2014) y Intervención Cheneral d’o Estau.

Fibra optica

A solución cheneral adoptada ye basada en fibra optica y puntualment, a on as dificultatz d’o terreno no lo permitan (menos d’o 5% d’o trazau total), se ferán servir como recurso equipamientos de radioenlaz IP.

Se tracta d’establir un ret mallau, con guarencias d’amplo de banda -500 Mbps de media en os puntos d’interconnexión de ret-, plena disponibilidat, con o 85% d’os puntos d’interconnexión en o nuclio d’as poblacions, y o 15% restante a menos d’1,5 kilometros.

Queda guarenciada l’ausencia de limites de descarga de datos en os servicios minoristas de banda ampla d’internet. Amás, a o 100% d’os centros educativos se i plega con acometida de fibra optica dedicada. D’ells, 192 (o 55%) disposarán d’acceso a internet de 100 Mbps simetricos con guarencia d’o 10% d’o cabal y tecnolochía FTTH (Fiber To The Home). Os atros 159 (45%) tendrán connexión de 50 Mbps simetricos con guarencia d’o 100% d’o cabal y tecnolochía DIBA (Data Internet Banda Ampla).

A inversión d’o Gubierno d’Aragón en iste ret de transporte de fibra optica guarencia os siguients prencipios basicos:

– Escalabilidat. Posibilidat de creiximiento seguntes a demanda d’os usuarios u por cambeos tecnolochicos sobre a tecnolochía emplegada.

– Perdurabilidat. Ye una infrastructura con largos plazos de vida util frent a os d’atras tecnolochías.

– Rentabilidat. Os costes de mantenimiento, guarencia y atención tecnica en caso d’avería son menors fendo servir fibra que os que se’n dan con equipos a l’aire libre.

– Neutralidat tecnolochica. L’alta capacidat d’iste transporte permite a neutralidat tecnolochica en os servicios minoristas y admite a-saber-las opcions (VDSL, FTTH, LTE, Wimax, Wifi,…).

En tres anyos

O plan de desplegue d’o ret mayorista contempla empecipiar a treballar o venient 15 d’abril ta tener a 89 localidatz d’as 348 con servicio mientres iste anyo (o 25%), 214 en 2016 (o 61%), 318 en 2017 (o 91%) y as 348 en 2018 (o 100% d’o desplegue). A la mayor parte d’as localidatz s’arribará con fibra optica de cabo a cabo. Por o que fa a os centros educativos y con a mesma calendata de comienzo ye previsto plegar en 137 d’os 351 en 2015 (39%), a 245 en 2016 (69%) y a o 100% mientres l’anyo 2017 (os 351).

Entre as condicions d’o contracto figura que l’operador habrá de desplegar y comercializar puntos d’interconnexión a o ret en os nuclios de población d’as zonas obchectivo d’ista actuación, asinas como en arias d’actividat interpresarial como puestos a on i haiga presencia de PYMES de qualsiquier sector u puntos d’actividat economica como poligonos industrials, centros turisticos u atros enclaves relevants.

Ta facilitar o desplegue d’os servicios de banda ampla se podrá aprofitar o Ret d’Infrastructuras de Telecomunicacions ya construida y con titularidat d’o Gubierno d’Aragón, que se meterá a la disposición de l’adchudicatario d’o contracto en rechimen de coubicación (housing), si bien o Executivo seguirá explotando iste ret t’os servicios que ameniste.

L’operador, amás de contar con o suyo ret y con o d’o Gubierno d’Aragón, habrá de financiar as nuevas inversions requeridas en infrastructuras y equipamientos. Una vez construidas asumirá o suyo mantenimiento y conservación entre a duración d’o contracto. Quan acabe, l’Administración recuperará tanto o ret que haiga meso a la disposición de l’operador como a infrastructura pasiva (obra civil, canalizacions, etc.) que s’haiga feito en tot iste tiempo.

Fuent: http://www.cronicadearagon.es/wordpress/aragon/el-gobierno-de-aragon-se-compromete-a-llevar-en-tres-anos-banda-ancha-de-nueva-generacion-a-348-localidades-y-a-351-centros-educativos

Una rispuesta a O Gubierno d’Aragón se compromete a levar en tres anyos banda ampla de nueva cheneración a 348 localidatz y a 351 centros educativos

  1. Pingback: El Gobierno de Aragón se compromete a llevar en tres años banda ancha de nueva generación a 348 localidades [arg]

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.