O gubierno de Castiella y Lión autoriza l’inicio d’as excavacions d’a mina de magnesitas en Borobia

O gubierno de Castiella y Lión publicau una disposición en que autoriza as excavacions. En Aragón os cinco partius con representación en Cortes refusan o prochecto

Foto: Río Manubles (http://aguamanubles.blogspot.com.es/)

Foto: Río Manubles (http://aguamanubles.blogspot.com.es/)

O pasau chueves, 8 de chinero, o gubierno de Castiella y Lión publicaba en o suyo boletín oficial –BOCYL– una disposición d’a suya consellería de Fomento y Medio Ambient, sinyada por Manuel López Represa como delegau Territorial d’a Chunta de Castiella y Lión en Soria, en que autoriza a la interpresa ‘Magnesitas y Dolomías de Borobia’ a “iniciar a excavación” en considerar “que as modificacions introducidas no se consideran modificación substancial d’o prochecto inicial”.

Encara que a Plataforma en Defensa de l’Augua y o Suelo leva mas de 10 anyos denunciando “l’atropello que significa iste prochecto minero en as afecciones a l’augua, os ríos, a tierra y a biodiversidat en Soria y en Aragón”, o gubierno de Castiella y Lión “s’ha instalau en o pensamiento unico, a clase politica ye feita a o ‘trapicheo’ con as interpresas mineras que s’han instalau ilegalment en toda a zona de Lión, igual que facioron en Borobia en a zaguera etapa d’a dictadura franquista con a mina Gandalia, se levoron o mineral y como present deixoron repuis enronaus, sin que haigan estau investigaus por os responsables sanitarios, a carretera quedó estricallada por o paso de cambions, y habió de pagar o lugar o suyo apanyo dimpués d’o zarre d’a mina”, denunciaba Ana Carrera, una d’as portavoces d’iste colectivo.

Manimenos a disposición publicada autoriza a modificación d’o denominau plan de labors, que incluye: Iniciar a excavación, como yera prevista, pero desplazada licherament ent’o noreste, ocupando a zona denominada en o prochecto como de protección, amanando-se ta l’encletau perimetral d’a explotación. O esvarro de cauces, pa privar a entrada d’auguas en a zona d’o prochecto, por medio de canals d’esvarro parcials en o costau norte d’a explotación. A realización de cunetas y balsas de decantación. Que as auguas de contacto que plegan en a zona d’operacions sían replegadas en un sector de menor cota d’o fondo d’o hueco. Una balsa de bombeyo d’estructura simpla, excavada en a penya d’o fondo d’a cota, pa dimpués ninviar a las balsas de decantación que podrán estar emplegadas pa lo riego de pistas u atras actividatz d’a explotación. Que a balsa de decantación ‘ueste’ s’excave dentro d’o hueco prochectau en a zona impermeyable d’o prochecto y a balsa ‘este’ difuera d’a zona prochectada d’o hueco minero en zona impermeyable de pizarras de teito. Que os ‘esterils’ procedents d’a excavación d’as balsas s’acopien difuera d’o hueco previsto d’a explotación, en as cercanías d’as ‘Casas de Arriba’, y tamién que se realicen movimientos d’acondicionamiento y nivelación pa oficinas y a planta mobil de machaqueu de mineral. Y finalment, l’acondicionamiento d’os accesos y vials internos y pontons pa lo paso d’as clamors existents.

Atamás d’as alertas medio ambientalistas, o gubierno d’o PP en Castiella y Lión, que conta con o firme emparo d’o PSOE, chuntos apreboron una resolución que refrendaba o suyo “total emparo a o prochecto d’inversión y cheneración d’emplego d’a mina de Borobia”, contina pus, encerrinau en l’inicio d’ista macro mina de magnesitas a cielo ubierto, situada chunto a la naixencia d’o río Manubles, y a uns tasos 200 metros d’Aragón. Tendría una extensión equivalent a 450 campos de futbol, mas de 450 hectarias, encara que a Evaluación y Estudeo d’Impacto Ambiental d’o prochecto en que s’emparó a concesión estió pa una extensión muito menor.

En Aragón, numerosos colectivos politicos, socials y ecolochistas s’han amostrau en reiteradas ocasions contrarios a ista explotación minera por o contundent deterioro ambiental que suposará pa l’aqüifero y medio ambient d’as redoladas afectadas, tanto en Aragón como en Castiella.

Atamás d’ista oposición, a la qual se suma a vía institucional, os cinco partius politicos con representación en as Cortes d’Aragón, PP y PSOE -en radical contradicción con o que emparan en Castiella-, o PAR -o candidato suyo a l’alcaldía de Zaragoza, Xavier de Pedro, como president d’a CHE adchudica os permisos-, IU y CHA, refusoron “a obridura d’a mina de magnesitas que afectaría ambientalment a las comarcas aragonesas de l’Aranda y Comunidat de Calatayut”, en una resolución aprebada unanimement, y que explicaba que “o prochecto minero a cielo ubierto causaría una grieu afección a recursos naturals y humanos y tendría serias conseqüencias hidrocheolochicas, ambientals y socioeconomicas pa los municipios aragoneses de l’entorno d’os ríos Manubles, Ribota, Aranda y Isuela, en a compleganza de Xalón”, y solicitaba a la Chunta de Castiella y Lión y a o gubierno d’o Estau espanyol “que aturen iste prochecto de traza definitiva”, o prochecto macrominero, por agora, sigue abanzando.

Fuent: http://arainfo.org/2015/01/el-gobierno-de-castilla-y-leon-autoriza-el-inicio-de-las-excavaciones-de-la-mina-de-magnesitas-en-borobia/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.