O Gubierno echipcio declara “grupo terrorista” a os Chirmans Musulmans

O Consello de ministos d'Echipto ha preso a decisión dimpués d'acusar a la formación d'o president derrocau Morsi de cometer iste martes un atentau en que morioron a lo menos 13 personas

Sinyal d'os Chirmans Musulmans

Sinyal d’os Chirmans Musulmans

O Consello de Ministros d’Echipto declaró ahiere a os Chirmans Musulmans como “grupo y organización terrorista“, anunció o viceprimer ministro y titular d’Ensinyanza Superior, Hosam Isa.

En declaracions espardidas por l’achencia estatal de noticias Mena, Isa informó d’a decisión d’o Gubierno, dimpués que ahiere un ataque suicida contra una siede policial causase a lo menos tretze muertos y 134 ferius en a ciudat de Mansura, en o delta d’o río Nilo.

A declaración d’a cofradía como grupo terrorista se basa en l’articlo 86 d’o Codigo Penal, que estipula as condenas ta qui atentan contra o Estau.

D’ista traza, Echipto aplicará as sancions estipuladas por a lei contra o terrorismo contra aquellas personas que participen en as actividatz d’o grupo, las financien u faigan propaganda a la suya favor por medio de qualsiquier medio.

Tamién se sancionará a qui s’unan a o grupo u sigan vinculaus a ell dende agora, precisó Isa, que adhibió que s’avisará d’a decisión a os países que sinyoron un alcuerdo de luita antiterrorista en 1998.

As Fuerzas Armadas y a Policía habrán de protecher as instalacions publicas, mientres que as fuerzas de seguranza serán as encargadas de vichilar as universidatz y “guarenciar a seguranza d’os estudiants frent a o terrorismo d’ixe grupo”.

Unatro grupo reivindica l’atentau

O grupo islamista con siede en o Sinaí Ansar Bayt al Maqdis ha reivindicau iste mierques l’atentau. Manimenos, isto no ha empachau que O Caire haiga iu contra os Chirmans.

Seguntes Ansar Bayt al Maqdis, os gubernants d’Echipto son combatindo a lechitimidat islamica y han redamau a sangre d’os oprimius musulmans. En o suyo mensache, han definiu l’edificio atacau como “o niedo de l’apostasía y a tiranía“.

“Seguiremos, si Dios quiere, combatindo-los”, ha prometiu en un comunicau penchau en una web islamista. Ansar Bayt al Maqdis, que o suyo nombre significa ‘Partidarios de Cherusalem’, reivindicó l’autoría de l’atentau falliu contra o ministro de l’Interior en O Caire o pasau mes de setiembre.

O Gubierno echipcio ha acusau de l’atentau a la formación de Mohamed Morsi, o president derrocau o pasau verano, ta chustificar ista decisión.

Fuent: http://www.eldiario.es/politica/Gobierno-egipcio-Hermanos-Musulmanes-terrorista_0_211029090.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.