O gubierno echipcio refusa l’ultimatum de l’exercito y le acusa de ‘chenerar confusión’

Contina a situación complicada en Echipto, en que l'exercito ha dau un plazo de 48 horas a o gubierno de Mursi pa que cumpla as demandas d'o pueblo

echiptoO president d’Echipto, Mohammad Mursi, ha acusau a l’exercito de chenerar confusión por haber dau un plazo de quaranta y ueito horas a la clase politica pa atender as demandas populars, y ha avisau que o país no cedería o estau civil. En un comunicau difundiu iste martes, Mursi diz que no estió consultau sobre o comunicau de l’exercito y que o conteniu d’iste puede ‘chenerar confusión en o complicau entorno nacional’.

A revuelta echipcia s’ha chirau agora contra os Chirmans Musulmans, y mils de personas han tornau a salir t’a carrera pa exichir a dimisión de Mursi, que fa tasament un anyo que ganó as esleccions. As protestas se fan porque manifestants y oposición consideran que s’han incumpliu as demandas democraticas que orichinoron a revuelta en 2011.

Ahiere o chefe de l’exercito, Abdelfata al-Sisi, daba un ultimatum de quaranta y ueito horas a os politicos pa cumplir os compromisos eslectorals y as demandas d’os manifestants. Unas horas dimpués, Mursi respondeba a traviés d’un comunicau que a consecución d’o estau civil heba estau a prencipal victoria d’a revolución contra o rechimen de Hosni Mubarak y que Echipto no acceptaría ‘baixo garra circumstancia’, tornar ta zaga. ‘O pueblo echipcio ha sacrificau a sangre d’os suyos fillos, a estabilidat y o desarrollo pa construir un nuevo estau y totz hemos eslechiu as vías democraticas como unica solución pacifica pa tractar as nuestras diferencias’, diz.

Entremistanto, cinco ministros han presentau a dimisión dende o domingo en solidaridat con as exichencias d’os manifestants.

Fuent: http://www.vilaweb.cat/noticia/4131054/20130702/govern-egipci-refusa-lultimatum-lexercit-lacusa-generar-confusio.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.