O Gubierno empentará l’aeropuerto de Uesca dende o 15 de noviembre

O 15 de noviembre se ferá una trobada con achents implicaus ta prebar de dar un emplego a la infraestructura

A colla de triballo creyau por o Gubierno d’Aragón ta reflotar l’aeropuerto Uesca-Perineus se reunirá por primera vez o 15 de noviembre, con presencia de l’executivo autonomo, o Concello de Uesca, a Diputación Provincial de Uesca, Aena, Aramón y, probablement, a companyía Pyrenair, que ye en tramites de disparixer.

Asinas l’ha anunciau en Uesca o consellero d’Obras publicas,  Rafael Fernández d’Alarcón, que ha manteniu una trobada de triballo con l’alcaldesa d’a ciudat, Ana Alós.

Alarcón ha apuntau que se son encetando negociacions con dos interpresas, una escuela de pilotos y una operadora aeria, intresadas en instalar-se en a infrastructura y s’ha amostrau optimista, ya que se diversificarán os usos de l’aeropuerto, bella cosa basico t’o suyo funcionamiento, seguntes Alarcón. S’aspera que a primera reunión d’o 15 de noviembre, entre os diferents ens y administracions, sirva ta seguir abanzando.

Por unatra parte, tamién o 15 de noviembre se reunirá, por primera vez, en a nueva lechislatura, o consello d’administración d’a Plataforma Lochistica y Industrial de Uesca, PLHUS. Lo fa con un punto prencipal en l’orden d’o día que ye revisar a plataforma y prebar de rendabilizar-la. Alarcón ha explanicau que cal revisar o programa comercial de Plhus ta aconseguir de verdat que ista inversión sía rentable, porque no l’ha estau.

Cal remerar que o secretaire d’estau d’infraestructuras, Victor Morlán deciba a zaguer semana que si por ell hese estau, no s’hese construyiu iste aeropuerto, que ya ye construyiu y que ye un d’os aeropuertos chestionaus por AENA con menor volumen de trafico.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.