O gubierno enchega o plan de control tributario que ferá 5 millons d’euros

Iste Plan de Control Tributario luitará contra o fraude fiscal comprebando expedients d'os zaguers 4 anyos. S'extenderá dica marzo de 2012 y será realizau por o personal propio d'a Dirección Cheneral de Tributos..

Rueda de prensa dimpués d'o Consello de gubierno

Rueda de prensa dimpués d'o Consello de gubierno

Luitar contra o fraude fiscal. Ye l’obchectivo d’o Plan Especial de Control Tributario enchegau por o Departamento de Ficienda y Administración Publica y d’o que hue ha tomau conoixencia o Consello de Gubierno.

Prencipiará a fer-se immediatament y “se va a fer por o personal propio d’a Dirección Cheneral de Tributos. Ells serán qui voluntariament lo leven a cabo y difuera d’a chornada cutiana. O coste t’o Gubierno será de 100 mil euros y a recabdación menima que s’aspera ye de 5 millons de euros”, ha apuntau o Portavoz d’o Gubierno, Roberto Bermúdez de Castro.

Se tracta d’una iniciativa que o Gubierno d’Aragón emprende agora por os diversos factors d’a situgación actual en a chestión tributaria. Por eixemplo, o feito que os anyos 2007 y 2008 estasen exercicios con gran actividat immobiliaria y operacions suchetas a l’Impuesto sobre  Transmisions Patrimonials y Actos Churidicos Documentaus, que por a suya cantidat y qualidat han de comprebarse con celeridat y en o más gran numero posible.

Amás o Consello de Gubierno ha aprebau o desbloqueo de dos linias d’aduya por un importe de 28 millons de euros ta modernizar explotacions y emparar a chovens agricultors. “Serán quasi 1.500 os demandants que tendrán posibilidat d’iste emparo en as tres provincias aragonesas”, ha asegurau o consellero de Presidencia.

Tamién s’ha autorizau l’aplicación especifica d’o Plan de achuste d’o Gasto Corrient y esferents alcuerdos con o Concello de Uesca en materia de protección civil y vertebración d’o territorio. Amás s’han aprebau alcuerdos con esferents institucions ta, dentre atros aspectos, empentar l’actividat investigadera, dar continuidat a la formación a traviés d’a “Universidat d’a Experiencia”, fer actividatz educativas y ludicas en o CRÍE Venda de l’Olivar en Zaragoza.

Roberto Bermúdez de Castro s’ha referiu posteriorment a las deudas pendients, reciprocas, existents entre o Gubierno d’Aragón y o Concello de Zaragoza. O portavoz de l’Executivo ha feito una crida a la leyaltat institucional d’o Concello zaragozano. “En as reunions que hemos feito con o Concello de Zaragoza se plegó a una serie de alcuerdos, y o Gubierno d’Aragón mantiene a suya parola: os datos d’as deudas pendients se cruciarán en reunions especificas y en ixa mesa se buscará l’alcuerdo”. En opinión de Bermúdez de Castro “os ciudadans no se mereixen l’espectáculo que se ye dando; cal recuperar a cordura”.

Sobre o bloqueo de fondos por incumplimiento de l’obchectivo d’o deficit o consellero de Presidencia ha expresau a “preocupación que existe en l’Executivo aragonés por l’actitut d’o Gubierno espanyol. Ista comunidat ye realizando plans d’achuste y de reducción d’o deficit publico que ye o que se nos demanda dende o Ministerio espanyol d’Economía y Ficienda que ye qui ye bloquiando distintos plans y fondos”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.