O Gubierno espanyol apreba a reforma de l’administración local

S'aprebó ahiere en Consello de Ministros un d'os prochectos de lei mas polemicos que afecta a la organización d'as administracions locals

montoro saenz santamaria

Montoro y Sáenz de Santamaría en a rueda de prensa ahiere. Foto: Gubierno d’Espanya (http://www.lamoncloa.gob.es)

Ahiere en Consello de Ministros s’aprebó o Prochecto de Lei de Racionalización y Sostenibilidat de l’Administración Local, una norma que ya yera prou criticada tot considerando que suposa un ataque a l’autonomía d’os municipios y podría privatizar mas servicios publicos, seguntes manifestaba a oposición, que refusa de tot a lei.

Seguntes explicó o ministro Cristobal Montoro en a rueda de prensa posterior a o Consello de Ministros, a lei tien como obchectivos evitar duplicidatz competencials con atras administracions, racionalizar a estructura organizativa de l’administración local, guaranciar un control financiero y presupuestario mas riguroso y favoreixer l’actividat economica local con midas liberalizadoras.

Montoro ha afirmau que ista reforma “ye promunicipalista” y que “somos amugando correctament o que han de fer as administracions locals y clarificando quála ye a competencia que estableixen os estatutos d’autonomías d’as comunidatz autonomas y a propia actividat y competencia de l’Administración Cheneral de l’Estau”. Ha explanicau asinas mesmo, que con a lei s’ordenan as actividatz d’o sector publico y se racionaliza a ufierta de servicios. D’ista traza, se definen con claridat as competencias de l’administración local: vivienda, turismo, servicios socials, sanidat (salubridat publica y fosals) y educación (cusirar a escolaridat obligatoria y cooperar con l’administración educativa pa consiguir solars pa construir nuevos centros educativos). Nomás quan siga guaranciau amprar os servicios obligatorios, siga posible financierament y no i haiga duplicidat con atros servicios d’atras administracions, os municipios podrán amprar atros servicios, siempre con o correspondient presupuesto.

Se potenciarán as Diputacions Provincials, que podrían coordinar bell servicio en caso que os concellos lo decidan, siempre y quan as diputacions lo puedan asumir a un coste efectivo mas baixo y en millors condicions. Os concellos son obligaus a publicar o que cuesta cada servicio publico. Os municipios que se fusionen voluntariament recibirán un mayor refirme economico de l’Estau pa “evitar a dispersión administrativa que en a-saber-las ocasions ye muit costosa”. Pa creyar nuevos municipios u separar-se, habrán de tener a lo menos cinco mil habitadors.

S’amuga a retribución a cargos politicos municipals, equiparando os chornals a os d’atros funcionarios equivalents, y s’amuga o numero de cargos representativos locals que pueden exercer as suyas funcions en rechimen de dedicación exclusiva mediant criterios poblacionals.

Como midas liberalizadoras pa favoreixer l’actividat economica local, l’exercicio d’istas actividatz no’n amenistará de licencia fueras de casos chustificaus por necesidat y proporcionalidat. Amás se suprimen os monopolios de lonchas y mercaus.

O prochecto de lei preveye un estalbio de 8.024 millons d’euros mientres os anyos 2013 a 2019. Montoro ha adhibiu que ye ubierto “a la maxima coincidencia con os grupos politicos”. Manimenos a oposición lo considera una “agresión” que afectará negativament a os servicios ampraus a la ciudadanalla.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.