O gubierno espanyol apreba una nueva reforma educativa

A fin d'a selectividat y d'Educación t'a Ciudadanalla, amás d'evaluacions finals en 3º y 6º de Primaria y en a ESO, y a financiación publica de colechios separaus por sexo entre as midas mas sinyaleras

Foto: Gubierno d’Espanya

En o consello de ministros de hue, o gubierno espanyol ha aprebau o prochecto de lei que reforma a educación en l’estau espanyol. Unatra vegada tornan a cambear-se as leis educativas, una cosa que pareixe “tradición” quan o gubierno cambea de color. O ministro d’Educación, Cultura y Esporte, José Ignacio Wert chunto a la vicepresidenta d’o gubierno espanyol y portavoz d’o mesmo, Soraya Sáenz de Santamaría, han presentau a nueva reforma.

A nueva lei, a Lei Organica t’a Millora d’a Calidat Educativa (LOMCE) modificará parte de l’anterior lei educativa, a Lei Organica d’Educación (LOE) feita en 2006 por o gubierno de Rodríguez Zapatero y que ya modificó atra lei educativa de l’anterior gubierno popular d’Aznar.

Entre as novedatz, en Primaria, en 3º, os alumnos habrán de pasar un examen d’evaluación t’a detección de dificultatz en l’aprendizache, en a que o centro, en caso de no superar-se decidirá si l’alumno pasa de curso u no. En 6º, en ferán atro os alumnos ta viyer si han superau os obchectivos que calen ta acceder t’a ESO.

L’actual titol d’Educación Secundaria Obligatoria (ESO), se consiguirá dimpués d’una preba final, que será esferent, pendendo si a persona va ta Bachillerato u ta FP. A valor d’a preba contará un 30% y as calificacions d’os cursos d’a ESO, un 70%. A preba se podrá repetir en convocatorias sucesivas en caso de no superar-se u de querer puyar a nota.

Educación t’a Ciudadanalla, asignatura d’a ESO, s’elimina en favor d’una nueva asignatura, Educación Civica y Constitucional, una d’as asignaturas y d’os cambeos que mas polemica han suscitau debiu a bells contenius que i apareixen u que se’n sacan.

A Formación Profesional (FP), tamién cambea. Os Programas de Qualificación Profesional Inicial se substituyen por a Formación Profesional Basica, que será de dos anyos.

A clamada Selectividat desapareixe ta dar paso a un examen d’evaluación final de caracter estatal que tendrá una valor d’un 40%, estando o 60% restant d’as calificacions obtenidas en o Bachillerato. Tamién, como pasa con as prebas d’evaluación final d’a ESO, podrán repetir-se en sucesivas convocatorias si se suspenden u ta puyar a nota.

Mientres, en as comunidatz a on no i haiga luengas cooficials, o gubierno espanyol fixará o 75% d’o curriculum a amostrar, y en ixas a on sí que n’i haiga, un 65%, establindo d’ista traza un mayor peso de l’executivo central en a decisión sobre os curriculums. A tamás d’as criticas de recentralización, Wert ha dito que “no se sacan competencias de chestión d’os gubiernos autonomicos”.

Os colechios en que l’amostranza siga separada por sexos podrán acceder a tener financiación publica, un punto que ya cheneró polemica fa bellas semanas.

O gubierno espanyol quiere con ista reforma aturar l’albandono y o fracaso escolar y ufre dialogo en a tramitación d’a lei con os actors educativos, socials y politicos bi embrecaus.

Una rispuesta a O gubierno espanyol apreba una nueva reforma educativa

  1. Pingback: O gubierno espanyol apreba una nueva reforma educativa | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.