O gubierno espanyol demanda a os EEUU explicacions sobre o espionache

Der Spiegel informó o sabado que Espanya ye un 'obchectivo a espiar' por a NSA

Embaixada en Madrit d'os EE.UU. Foto: Daniel Lobo (CC-BY)

Embaixada en Madrit d’os EE.UU. Foto: Daniel Lobo (CC-BY)

O ministerio d’Afers Extranchers espanyol se reunirá con o numero dos d’a embaixada d’os Estaus Unius d’America en Madrit. Lo fa pa pedir explicacions por as informacions que apuntan que Espanya ye un d’os ‘obchectivos a espiar’ d’os EE.UU., seguntes abanzó o sabado o semanario alemán Der Spiegel. O gubierno espanyol quiere saber si ye cierto que Espanya figura en ista lista.

L’Achencia de Seguridat Nacional norteamericana (NSA) tamién considera ‘obchectivos’ d’espionache estaus como Alemanya, Francia, Chapón y Italia, seguntes documentos filtraus por o exanalista d’a NSA Edward Snowden a o semanario. Os documentos confirman que a Unión Europea ye un d’os prencipals obchectivos d’o espionache norteamericano, que se fixa especialment en a politica exterior, o comercio exterior y a estabilidat economica.

Amás, Der Spiegel explica que a NSA clasifica os estaus en función d’o suyo intrés en una escalera que va de l’1, que ye intrés maximo, a o 5, que ye intrés minimo.

En o livel 1 se sitúan China, Rusia, Irán, Pakistan, Corea d’o Norte y Afganistán. Alemanya se troba en una posición intermedia, como Francia u Chapón, y por debant d’Italia y Espanya, seguntes un documento con calendata d’abril de 2013 que estableixe as ‘prioridatz d’intelichencia’ d’os EE.UU. Por dezaga quedarían estaus como Cambocha, Laos, Vaticano, Finlandia, Croacia, Dinamarca u a Republica Checa, en o livel 5.

Edward Snowden ha filtrau istes zaguers meses bells documentos d’os servicios secretos d’os EE.UU., que han quitau a la luz a existencia d’un programa global d’espionache d’as comunicacions telefonicas y d’o transito d’internet. Isto ha chenerau un gran debat sobre o dreito a la privacitat d’os ciudadanos y o comportamiento de Washington con os suyos suposaus aliaus. Os EE.UU., por a suya parte, esfienden que istes metodos han permitiu d’aturar atentaus tamién en estaus aliaus.

Fuent: http://www.vilaweb.cat/noticia/4138664/20130813/govern-espanyol-demana-eua-explicacions-lespionatge.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.