O gubierno espanyol leva t’o Constitucional dos leis aragonesas

O gubierno espanyol no quiere que os biens sin duenyo pasen a Aragón y no a l'Estau

2 diciembre, 2011 | Economía | Autor: Arredol | Tweet

O Consello de Ministros espanyol (en funcions) ha aprebau en a suya reunión de hue solicitar a o president d’o Gubierno espanyol a interposición de senglos recursos debant d’o Tribunal Constitucional espanyol contra as leis de Contractos d’o sector publico y d’o Patrimonio d’Aragón.

Os recursos, que contan con o dictamen favorable d’o Consello d’Estau, estableixen que en beluns d’os preceptos contenius en istas dos leis s’invaden as competencias propias de l’Estau espanyol.

En concreto, en a Lei de Contractos d’o Sector Publico, s’ha produciu una invasión de competencias por parte d’a comunidat autonoma, entre atras qüestions, por lo que fa a o procedimiento simplificau d’adchudicación de contractos, que suposa en a practica a regulación d’un procedimiento nuevo no previsto en a lei estatal de Contractos d’o Sector Publico.

Por lo que fa a la Lei de Patrimonio, o recurso se centra en a suya Disposición Adicional Sexta que fa referencia a las fincas sin duenyo conoixiu (bienes mostrencos). O Gubierno espanyol creye que, si bien a comunidat autonoma tiene competencia ta lechislar en o suyo propio patrimonio, no puede modificar a lechislación vichent sobre Patrimonio d’as Administracions Publicas, en determinar que en o futuro no s’incorporarán a o Patrimonio de l’Estau, sino a o d’a Comunidat, os biens inmuebles sin duenyo conoixiu.