O Gubierno espanyol para durismas sancions debant de l’aumento d’a protesta social

"Faltar" u "coaccionar" a la Policía en una protesta puede levar a una sanción de 30.000 euros A nueva Lei de Seguridat Ciudadana contemplará 16 nuevos supuestos que castigar

Dispositivo policial en a siede d'o PP

Dispositivo policial en a siede d’o PP

A nueva Lei de Seguridat Ciudadana replegará como infracción muit grau participar en una manifestación debant d’o Congreso d’os Diputaus u qualsiquier atra institución d’o Estau si ista no ha estau comunicada a Delegación d’o Gubierno, u si habendo-lo feito, se vieda. Pero no nomás participar en a protesta será obchecto de castigo: aquells que la hesen convocada a traviés d’internet, os retz socials u qualsiquier atra vía podrán estar tamién sancionaus por haber cometiu una infracción muit grau. As posibles pinyoras pa los unos y os atros oscilarán entre os 30.001 y os 600.000 euros, seguntes o Ministerio de l’Interior.

Encara resonaba l’eco d’a vaga cheneral d’o 29 de marzo de 2012 quan Jorge Fernández Díaz anunció que convocar una protesta que acabase en disturbios sería delito. De vez, advirtió que a resistencia pasiva tamién sería incluida en o nuevo Codigo Penal. O ministro de Chusticia aseguró seis días dimpués que garra d’ixas dos accions se planteyaban en o borrador que o suyo departamento paraba. Un anyo y medio dimpués d’aquella discrepancia, o Gubierno tien presto un Debantprochecto de Lei Organica de Seguridat Ciudadana con 55 infraccions que vienen a suplir l’ausencia de faltas en o nuevo Codigo Penal. Asinas, d’as 39 infraccions que replega actualment a ‘Lei Corcuera’ pasará a haber-ne 55. D’ixas 55 infraccions, 21 en serán muit graus, como as protestas no autorizadas debant d’o Congreso.

L’Audiencia Nacional frenó fa un anyo de tot l’intento d’Interior d’atribuir a os manifestants de ‘Rodea o Congreso’ y a os convocants de la protesta un delito contra as altas institucions d’o Estau. O Codigo Penal tipifica como delito “alterar” o normal funcionamiento d’a Camara quan os diputaus sían reunius. Quan s’aprebe a nueva Lei de Seguridat Ciudadana no caldrá nian que i haiga un solo diputau dentro pa que o convocant u o manifestant sía acusau de cometer una infracción muit grau y estar castigau con dica 600.000 euros.

Aquella manifestación d’o 25 de setiembre de 2012 debant d’o Congreso nomás le valió imputacions a manifestants acusaus de protagonizar altercaus violentos a la suya fin. Pero as suyas conseqüencias han iu muito mas cara allá. O Ministerio de l’Interior y o PP, por una parte, y os convocants y manifestantes por unatra, libroron una batalla por atribuir a atro a responsabilidat d’os incidents. O departamento de Jorge Fernández Díaz defendió as cargas como proporcionadas a la menaza que representó a protesta y encara que no le quedó mas remedio que ubrir una investigación por l’actuación policial en a estación d’Atocha, deixó entre meses l’expedient en suspenso dica que lo zarró sin responsables.

Un d’os argumentos d’os manifestants yeran as imachens gravadas por ells mesmos con os suyos telefonos mobils. Pus bien, a difusión d’imachens d’antidisturbios mientres as manifestacions tamién pasará a constituir una infracción muit grau, castigada dica con 600.000 euros. “Faltar, humillar, menazar u coaccionar” a os miembros d’as Fuerzas de Seguridat constituirá una infracción grau, con pinyoras de 1.001 a 30.000 euros, mientres que difundir en Internet datos d’os achents que s’entiendan como un atentau contra a suya intimidat u a d’a suya familia, u que contribuigan a desbaratar una operación, será castigau igualment con pinyoras de dica 600.000 euros. Con a nueva Lei, constituirá una infracción grau no entregar o DNI a o policía que lo reclame.

Por o de demás, tapar a cara con una capucha, una gorra u un casco suposará igualment una fuerte pinyora –infracción muit grau- si s’ha feito pa alterar l’orden publico en una manifestación, independientment que l’acción cometida sía antiparte considerada delito. Finalment, y en contra d’o que abanzó a semana pasada Fernández Díaz, o escrache no constituirá una infracción en sí, seguntes fuents d’Interior. Ara que, a existencia d’ista nueva forma de protesta ha motivau que a proxima Lei de Seguridat Ciudadana capacite a la Policía pa establir cordons de seguridat quan considere que se ye dando una d’istas accions, que o Gubierno denomina “d’acoso”.

Protestas ecolochistas

En o capitol de desobediencia civil tamién se veyen afectaus aquells que protagonicen protestas de conteniu ecolochista. Por eixemplo, os activistas que sobrevuelen una central nucleyar pa trucar o ficacio sobre os efectos adversos d’ixa mena d’enerchía cometerán una falta muit grau, igual que os que lo faigan sobre un aeropuerto u qualsiquier infrastructura considerada “critica”. Si atra mena de manifestants optan por colapsar con os suyos vehíclos una arteria, como fació en Catalunya o movimiento que s’oposa a o pago de peaches, as Fuerzas de Seguridat tendrán potestat pa disolver a protesta, seguntes a nueva Lei. Escalar ta un monumento u edificio emblematico será considerau falta grau.

Interior asegura que pa elaborar o Debantprochecto no solament s’ha reuniu con sindicatos de Policía sino tamién con organizacions vecinals y asociacions de pais d’alumnos. De feito, d’as infraccions cometidas por os menors habrán de responder os suyos pais. O Ministerio creye que ixa mida funcionó en o combate d’a ‘kale borroka’ en País Vasco y Nabarra y por ixo la incluye agora en a nueva Lei de Seguridat Ciudadana.

Por baixo d’as infraccions muit graus serán as catalogadas como “graus”, castigadas con pinyoras d’entre 1.001 y 30.000 euros y as lieus, que conlevan o pago d’entre 100 y 1.000 euros. Dende o Ministerio de l’Interior se recuerda que as tres menas de faltas y as pinyoras que conlevan no suposan garra modificación respective a o texto agora vichent. En l’apartau d’infraccions graus se sitúa por eixemplo ofrir u reclamar sexo amán de colechios, parques u atras zonas freqüentadas por menors. D’igual forma se castigará l’exercicio d’a prostitución en as carreteras u vías de servicio, en meter en risque a seguridat vial.

Una planta de mariguana, falta grau

Por o que fa a la tenencia y consumo de drogas, se continará castigando con pinyoras todas dos actuacions en a vía publica y l’albandono en a mesma d’utensilios relacionaus con o transporte u consumo. Y una novedat: si plantar mariguana en una determinada cantidat ya yera delito si teneba por obchecto o trafico d’estupefacients, agora se pinyorará o cautivo de cantidatz que no tiengan tal fin y, por tanto, no sían destinadas a o narcotrafico sino a o consumo.

Atras infraccions graus serán o consumo d’alcohol en a carrera si perturba a tranquilidat, maltractar a animals en espectaclos no autorizaus, participar en as denominadas “cundas”, que tresladan a os toxicomanos dende o centro d’as ciudatz t’os poblaus d’a droga situaus en l’extrarradio.

Fuent: http://www.eldiario.es/politica/multa-convocar-protesta-Twitter-Congreso_0_198430170.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.