O gubierno espanyol planteya fer pagar a os chubilaus o 10% d’o coste d’os medicamentos

A mida s'explicará a las comunidatz en o Consello Interterritorial de Salut de hue.

A ministra de Sanidat, Ana Mato

Os pensionistas, que actualment no pagan cosa por os medicamentos que consumen, n’habrán d’abonar un 10% d’o pre, con un limite d’entre 10 y 20 euros cada mes, mientres que a las personas activas, que ya abonan o 40% d’as recetas, se les aumentará l’aportación dica o 50% u o 60%, seguntes a renta. Ye a proposa que o gubierno espanyol, a traviés d’a ministra de Sanidat, Servicios Socials y Igualdat, Ana Mato, quiere planteyar a las comunidatz hue mientres o Consello Interterritorial de Salut. A mida de copago d’a despensa farmaceutica se podría aprobar o viernes en o consello de ministros espanyol.

Ta evitar perchudicar a os enfermos cronicos, a proposa preveye bellas excepcions parcials, como agora que a os pensionistas que gasten mas de diez euros mensuals mientres tres meses consecutivos, se les tornarán os diners que haigan abonau por dencima de trenta euros.

A fin d’a gratuidat d’as medicinas t’os pensionistas ye una d’as cinquanta midas que quiere planteyar Mato a las comunidatz hue, ta estableixer un catalogo de servicios socials, criterios comuns de calidat y ta l’emplego responsable d’istos servicios, y guaranciar a sostenibilidat d’a dependencia.

Con iste nuevo paquete de midas, o gubierno espanyol aspera estalbiar unos 3.700 millons d’euros, d’os 10.000 que quiere retallar en sanidat y educación con ‘mas racionalización, a eliminación de duplicidatz y a eficiencia en a chestión d’os grans servicios publicos’.

Fuent: http://www.vilaweb.cat/noticia/4003618/20120418/govern-espanyol-planteja-pagar-jubilats-10-cost-medicaments.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.