O gubierno espanyol puya l’IRPF y l’IBI

A mida l'han dita como "recargo temporal de solidaridat en as rentas"

Os quatre ministros que han feito a rueda de prensa

Os quatre ministros que han feito a rueda de prensa

O Gubierno espanyol ha aprebau una serie de cambeos fiscals mientres os dos proximos anyos debant d’o desfase que s’ha produciu en o deficit publico, que se situará finalment en o 8% iste anyo y no en 6% inicial que heba planteyau o Gubierno anterior, seguntes ha dito Soraya Sáenz de Santamaría, portavoz d’o gubierno espanyol.

A la puyada d’impuestos l’han dito “recargo temporal de solidaridat en as rentas d’o triballo y d’o capital”, en parolas de Sáenz de Santamaría.

O gravamen s’aplica en os diferents tramos de l’IRPF. a conduta estatal puya en una escala d’o 0,75% t’o primer ran de renta dica o 7% en o ran mas elevau, a partir de 300.000 euros de base liquidable.

Amás, ha aprebau un incremento de l’Impuesto de Biens Inmuebles (IBI) ta totz dos proximos anyos que afectará a las viviendas que se situguen por alto d’a valor meya.

D’a mesma forma, ha extendiu a tot 2012 l’IVA d’o 4% t’a compra de vivienda nueva y ha recuperau a deducción t’a vivienda en propiedat con efecto retroactivo dende 2010. En Impuestos Especials, ha eliminau practicament a bonificación a o gasoleo profesional.

Conchelación salarial ta funcionarios y d’o salario minimo interprofesional

Una d’as mas midas mas polemicas d’o nuevo executivo ye a conchelación d’o salario a os funcionarios y d’o salario minimo interprofesional. Amás d’a conchelación salarial a os emplegaus publicos, o Gubierno espanyol ha aprebau l’ampliación d’a suya chornada laboral a 37 horas semanals. A taixa de reposición de funcionarios será de zero fueras d’os cuerpos y fuerzas de seguranza de l’Estau y vichilancia y recaudación.

O Gubierno ha aprebau a conchelación d’o salario minimo interprofesional ta 2012 en os actuals 641,40 euros mensuals a causa d’a dificil conchuntura economica, seguntes confirmó a ministra portavoz d’o Gubierno, Soraya Sáenz de Santamaría.

Adiós al canon dichital

O Consello de Ministros tamién ha aprebau iste viernes a supresión d’o canon dichital, que se substituirá por un sistema de protección de copia privada. Asinasmesmo, se regula a Comisión de Propiedat Intelectual -integrada dentro d’a Lei d’Economía Sostenible- ta protecher os dreitos d’os creyadors, lo que ubre a puerta a trancar webs sin pasar por o chuez, un d’os aspectos más creticaus d’a Lei Sinde que ye a lei d’a que s’ha aprebau o reglamento.

Atras midas

Por unatra parte, o Gubierno espanyol ha aprebau un alcuerdo de no disponibilidat presupuestaria de 8.900 millons d’euros. Tamién s’ha aprebau a reducción de cargos superiors en l’Administración publica y una reducción d’o 20% d’as subvencions publicas a partius politicos, sindicatos y organizacions patronals y s’ha suspendiu a encorporación de nuevos beneficiarios a la Lei de Dependencia.

O Gubierno espanyol tamién prorroga a prestación de 400 euros a os desemplegaus de larga duración. La aduya de 400 euros a os aturaus, ligada a formación dentro d’o clamau ‘Plan Prepara’, *finaliza o proximo 15 de febrero. Sáenz de Santamaría ha indicau que se prorrogará ista aduya por atros seis meses mas, dica meyaus d’agosto de 2012. Tamién se puya las pensions un 1%, encara que l’IPC ha puyau 2,9%.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.