O gubierno espanyol se compromete a empentar a TCP y desdoplar a N-II y a N-232

A ministra espanyola de Fomento ha presentau o prochecto de Rete transeuropeo de transportes, an que ye incluyita de nuevas a TCP, como un eixe más adhibiu a o Corredor Mediterranio y o Cantabrico. Iste ye o cambeo más important d’o rete, en rilación con o que esfendeba o zaguer ministro espanyol José Blanco, que deixaba o Corredor Central aturau en Zaragoza. En tot caso, istas intincions espanyols no son compartidas por Europa que ya deixo platera a suya opción por financiar o corredor mediterranio, por a que entendeban como gran dificultat de foradar os Pirineos por o centro ta o transporte de mercancias.

Dende o Gubierno, a presidenta Luisa Fernanda Rudi, ha aculliu istas parolas como buenas t’Aragón ya que “enamplan o prochecto de l’anterior gubierno socialista”. Rudi creye que si o gubierno espanyol leva entabant iste prochecto, ta Europa, a UE habria de financiar as obras contempladas, como a TCP por Aragón.

Amás d’o prochecto de trens, tamién han habiu modificacions en carreteras. En iste caso, o prochecto, contempla fer de dople via a N-232 entre Figueruelas y Logronyo. Una parti d’ista carretera, a parti navarra, ya ye desdoplada, y s’habrian d’acometer os tramos Figueruelas-Cortes y Castejón-Varea. Tamién ye contemplau creyar dople via en a A-2 dende Alfajarín enta Fraga, o zaguer tramo de via unica d’ixa carretera. Os dos tramos d’as dos carreteras son os piors puntos negros d’accidents d’o país. Encara no se conoixen plazos ni presupuestos ta fer as obras.

L’anecdota

A inclusión d’istos tramos, reclamaus dende fa tiempo, ha prevocau l’alegría d’o PP aragonés, tanto, que en un tuit, que a la fin han borrau hue, deciban: “RT @pparagon Ana Pastor va a impulsar el desdoblamiento N-232 entre Fraga y Alfajarín” trafucando as dos obras anunciadas por a ministra espanyola.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.