O Gubierno griego decide de prorrogar o “corralito” bancario

Varufakis heba pronosticau que o zarre de bancos se levantaría dimpués d'o referendum. A mida plega en vispras que o BCE decida si mantiene u ixampla a liquidez a la banca helena

Alexis Tsipras. Foto: FrangiscoDer (CC-BY-SA 3.0)

Alexis Tsipras. Foto: FrangiscoDer (CC-BY-SA 3.0)

O Gubierno griego para un nuevo decreto ta extender por uns días mas o “corralito” bancario en o país, seguntes informa l’achencia Reuters citando fuents bancarias. A mida, anunciada o pasau 28 de chunio por o primer ministro Alexis Tsipras, s’implantó fa una semana ta frenar a salida masiva de capitals d’os bancos y privar que istes entrasen en fallita, dimpués d’a convocatoria d’o referendum d’o pasau domingo, en que una mayoría absoluta de griegos (61%) ha refusau as midas d’a troika.

A prorroga d’o “corralito” plega con a banca griega en una delicadisma situación, en vispras que Grecia presente maitín una nueva propuesta en a cumbre de chefes d’Estau y de Gubierno de países de l’euro que se celebrará en Bruselas, y a l’aspera que o Banco Central Europeu (BCE) decida ista tarde si mantiene, cancela u ixampla a liquididat extraordinaria a la banca helena d’as linias de credito extraordinarias, conoixidas como ELA. A banca griega no tiene acceso a os mercaus ni a la financiación estandar d’o BCE y debe compensar os diners que quitan os suyos clients, temerosos d’una trencadura de l’euro, con ixa linia d’emerchencia.

Actualment, ista linia ye fixada en 89.000 millons d’euros, pero iste livel d’oxicheno financiero ya no ye prou ta mantener a salvo a banca y muito menos ta reubrir as entidatz o martes, como heba prometiu o ya dimitiu ministro de Finanzas griego, Yanis Varufakis, que iste maitín ha anunciau que albandona o cargo “ta facilitar un alcuerdo” con os acreyedors de Grecia.

A patronal bancaria de Grecia avisó a semana pasada que con os 1.000 millons d’euros que le’n quedaba o pasau viernes podría, como muito, sobrevivir dica iste lunes. O president d’o Parlamento Europeu, Martin Schulz, avisó anueit que a ideya de reubrir os bancos ista semana que heba anticipau Varufakis yera “periglosa”.

O control de capitals imposau dende fa una semana en Grecia conlleva o zarre d’os bancos y a clausura d’a bolsa. Os griegos solament pueden quitar 60 euros diarios en os caixers automaticos, que funcionan un maximo de 12 horas a o día, encara que o viernes pasau ya se produció escasez de billetz de 20 euros. A mida, que no afecta a os turistas (que pueden fer servir as tarchetas de credito u debito emitidas en os suyos países d’orichen), tampoco no s’aplica a os pagos con tarcheta en l’interior d’o país ni a las transaccions internas a traviés d’os servicios bancarios d’as pachinas web.

Fuent: http://www.eldiario.es/economia/Gobierno-decide-prorrogar-corralito-bancario_0_406310035.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.