O gubierno valenciano anuncia o zarre de d’a televisión publica valenciana

L'anuncio plega chusto dimpués de que o Tribunal Superior de Chusticia declarase nulo o ERE que afectaba a la plantilla de RTVV

rtvvO gubierno valenciano ha anunciau en a tardi d’iste martes que zarrará a canal publica de televisión d’o País Valenciano. A noticia se feba publica por a mesma televisión de man de tres presentadors rodiaus de una representación de treballadors d’o meyo de comunicación. Ista decisión l’ha preso o gubierno de Valencia horas dimpués de que o Tribunal Superior de Chusticia de Valencia declarase nulo o Expedient de Regulación d’Emplego presentau, a on que se forachitaba a quasi 1000 personas. Fa dos anyadas o mesmo gubierno trancaba tamién a emisión de TV3 en o País Valenciano.

A sentencia, que se feba publica o maitin d’o martes, establiba que se reincorporasen os treballadors afectaus y declaraba que se heba “crebau a normativa d’os EREs y os dreitos fundamentals y libertatz publicas d’os treballadors”. Antimás, remarca que “se remató aplicando a propuesta primera d’o consello d’administración, sin acceptar-ne garra d’as presentadas por os sendicatos que no yeran tan traumaticas”. “Encara que RTVV tien caracter publico y achustau a presupuesto, tien a obligación de negociar de buena fe”, adhibe a sentencia.

O gubierno de Valencia ha esfendiu os motivos economicos que les han levau a prener a decisión: “Nomás o coste de gastos de personal d’una plantilla de 1.700 treballadors implicaría alto u baixo 72 millons d’euros, una cantidat que caldría sumar-le-ie o gasto de funcionamiento y mantenimiento de RTVV, un coste que a Generalitat no puet asumir en iste inte.”

Os treballadors d’a televisión publica se concentroron ahiere, chunto con ciudadans que les refirmaban, debant de l’edificio gubernamental d’a presidencia d’a Generalitat Valenciana, demandando a dimisión de Alberto Fabra. Os informativos d’o martes, antimás, vincloron a directivos d’a interpresa con casos de corrupción y delitos sexuals, y bells treballadors de RTVV ya han prencipiau a denunciar “a manipoliación informativa imposada por os gubiernos de Zaplana y Camps”.

Tamién han feito publico lo siguient comunicau:

“Os treballadors de RTVV queremos amostrar o nuestro refús a la decisión unilateral d’o gubierno valenciano de trancar la radio y televisión publica d’os valencians; un meyo que, mientres 24 anyadas de servicio, ha treballau por a vertebración d’o nuestro territorio y por a espardidura d’a nuestra historia, cultura y luenga.

Ni os valencians ni os treballadors no son responables d’a mala chestión politica y economica que ha fundiu iste meyo. Consideramos una vileza y un acto gabacho a decisión d’o zarre como a unica solución d’os problema economicos d’a intepresa, problemas que tienen un orichen politico y que exichen responsabilidatz politicas.

Os treballadors de RTVV denunciamos que ex-directivos d’ista interpresa son implicaus en casos de corrupción enreligaus en o caso Gürtel; ex-directivos d’ista interpresa son encausaus por casos d’abusos sexuals a treballadors d’ista casa. Ex-directivos d’ista televisión han feito un ERE ilegal… Y agora os treballadors hemos de pagar os platos crebaus y renunciar a un servicio publico. Cinco millons de valencianos se quedan sin a suya radio y televisión.”

 

Una rispuesta a O gubierno valenciano anuncia o zarre de d’a televisión publica valenciana

  1. Pingback: Fabra anuncia o zarre de d’a televisión publica valenciana | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.