O Gubierno y o PSOE pactan aprebar una lei sobre os desafucios antes de cabo d’anyo

Gubierno espanyol y oposición se meten d'alcuerdo ta fer una lei que ature o drama d'os desafucios que en as zagueras semanas s'ha cobrau o suicidio de dos personas en l'Estau

Stop Desahucios Zaragoza. Foto: AraInfo

Gubierno y PSOE se metioron d’alcuerdo ta empentar una lei con caracter d’urchencia que permita frenar a sangría d’os desafucios. A vicepresidenta, Soraya Sáenz de Santamaría, se reunió con a vicesecretaria cheneral d’o PSOE, Elena Valenciano mientres mas de dos horas en una trobada que, seguntes fuents que conoixeban d’ella, remató con un alcuerdo de fondo y de forma por parte de todas dos partes.

O Gubierno y o prencipal partiu d’a oposición son d’alcuerdo en que a reforma se tramite de traza urchent ta que os suyos efectos puedan tener valor antes de cabo d’anyo. Por agora, as negociacions implicoron nomás a dos prencipals partius politicos tot y que iste mesmo miercols o lider de IU, Cayo Lara, le demandó a Rajoy en a Moncloa que no lo mantenese a la marguin de l’alcuerdo.

O guant lo lanzó Alfredo Pérez Rubalcaba mientres o debat d’a semana pasada en o Congreso, a on convidó a o president d’o Gubierno, Mariano Rajoy, a treballar chuntos ta buscar solucions t’o drama hipotecario que traviesan muitas familias.

Dimpués d’os cenyos de Rajoy y Rubalcaba en a tribuna, a vicepresidenta d’o Gubierno telefonió a Elena Valenciano y quedoron ta reunir-se ista semana. Si as intencions d’os dos prencipals partius plegan a buen puerto, ixa futura lei sería o primer gran alcuerdo entre Gubierno y oposición dende que Rajoy ye president.

O PSOE proposa obligar a os bancos a ufrir periodos de condutas tovas prolargaus en o tiempo a ixos hipotecaus que no puedan fer frent a os suyos pagos. Seguntes a proposa socialista, o banco y o suyo client habrán de retomar a relación de pagos normal quan a situación economica de l’hipotecau lo permita.

En o sino d’o PP son conscients d’a necesidat de meter fren a una escalada de desafucios que saben que irá en aumento, creyando un evident conflicto social. Os dirichents populars no amagan ya que o codigo de buenas practicas bancarias, empentau por Rajoy, ye ineficaz en a luita contra os desafucios, ya que no obliga a las entidatz bancarias a quasi cosa.

Fuent: http://praza.com/economia/2616/goberno-e-psoe-pactan-aprobar-unha-lei-sobre-os-desafiuzamentos-antes-de-fin-de-ano/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.