O Instituto Aragonés de Sciencias fa la 8ena Convocatoria d’o Programa Focuss

O Programa Focuss, chestionau por l'Instituto Aragonés de Sciencias d'a Salut, pende en estancias formativas breus de caracter practico.

Medicas d'o Servet en l'aula de simulación (Foto: D.Ch.A.)

Medicas d’o Servet en l’aula de simulación (Foto: D.Ch.A.)

Arredol de 500 profesionals sanitarios aragoneses se formarán en tecnicas especializadas d’a man de colegas d’atros centros sanitarios d’Aragón, por meyo d’as actividatz formativas incluyidas en a ueitena convocatoria d’o Programa Focuss, que l’Insitituto Aragonés de Sciencias d’a Salut ha prencipiau dende o 14 de febrer.

Focuss ye un metodo de formación ta profesionals d’o Sistema Sanitario Publico d’Aragón que pende en facilitar l’acceso ta una formación practica, organizada, de calidat y evaluada. Ye endrezau nomás a l’aprendizache practico de tecnicas diagnosticas, terapeuticas, de chestión u de comunicación. Se fa en bellas estancias en centros de salut y hespitals mientres as que profesionals expertos en bellas tecnicas ufren formación dreita  a l’alumnalla trigada. Os criterios  de selección d’o programa priorizan a aquells profesionals que amenistan en a suya vida cutiana bella formación concreta y favoreixen as zonas aluenyadas d’os grans centros.

O progarama Focuss permite, seguntes o gubierno d’Aragón, “fer valurar o conoiximiento y a capacidat docent d’os profesionals aragoneses, de vez que les proporciona consciencia d’o suyo ran de conoiximiento en participar en l’amostranza. D’atra man, Focuss, en favoreixer a comunicación y l’intercambio d’experiencias entre profesionals, fa más facil a creyación de retes informals de colaboración y cooperación entre personas, servicios y centros.”

En l’anyada 2006 estió a primer convocatoria Focuss, con un total de 39 programas, 107 docents, 134 alumnos, y 27 centros docents participants. O programa, en ista ueitena edición, tien previstos 86 programas, arredol de 500 docents y 500 alumnos y 70 centros participando-ie.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.