O libro ‘Memorias de Joaquín Costa’ entre os más vendius

O volumen fa accesibles por primer vez os escritos personals d'o polifacetico autor aragonés, coincidindo con o suyo centenario.

Molimento a Joaquín Costa en Zaragoza. (Foto: Biquipedia)

O libro Memorias, de Joaquín Costa, editau por o profesor d’a Universidat de Zaragoza, Juan Carlos Ara ye entre os mas vendius en Aragón. O volumen, presentau recientment en Uesca, fa accesibles por primera vez, coincidindo con o suyo centenario, os escritos personals d’o polifacetico autor oscense. Por tercera semana consecutiva, ista obra universitaria, naixida en Uesca, ye incluida en o listau d’as cinco obras de “no ficción” mas vendidas en Aragón que elabora o quaderno Artes y Letras, d’Heraldo d’Aragón.

As Memorias de Joaquín Costa (Monzón, 1846- Graus, 1911) replegan a revisión autobiografica d’a trayectoria vital d’iste politico y pensador altoaragonés entre os anyos 1864 y 1878. A os quadernos que abordan iste periodo d’a suya vida, que incluye estancias en Graus, Uesca, Madrit u Cuenca, exercendo d’estudiant, profesor y churista, s’adhibe en ista edición una serie de textos, baixo o titol de “Fuellas sueltas”, que s’adentran en as suyas vivencias d’os anyos 1878 a 1880.

Ta Pedro Rújula, director d’a editorial Prensas Universitarias una d’as razons d’iste exito, especialment relevant ta una publicación naixida d’una investigación academica, ye que “permite conoixer, a traviés de pachinas dica agora ineditas, a choventut d’un altoaragonés d’a segunda metat d’o sieglo XIX que, por empenyo y capacidat, aconsigue ficar-se en a elite intelectual espanyola”. L’aproximación a iste choven Costa, “en plena ebullición intelectual”, se fa a traviés d’una publicación que aconsigue “combinar o rigor d’una publicación universitaria con l’intrés d’o publico”. Y que, insiste iste profesor d’a Universidat de Zaragoza, “se leye con un placer enorme”.

Ta Juan Carlos Ara, istas Memorias revelan o caracter y as ambicions d’o pensador, “aduyando-nos a responder a la pregunta de quí estió Costa?”. Y lo fan “a traviés d’unas pachinas agonicas, fillas d’o suyo fuerte caracter”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.