O maquinista de l’accident de Compostela recibió una trucada y prebó de frenar antes

S'han ubierto as caixas negras d'o tren que permitirán conoixer millor qué sucedió en l'accident

Tragedia_en_Santiago_de_Compostela_(o)

Locomotora de l’Alvia 730 accidentau. Foto: Contando Estrelas (CC-BY)

O Tribunal Superior de Chusticia de Galicia ha dau treslau d’as primers informacions trobadas en as caixas negras d’o tren Alvia accidentau a pasada semana en Sant Chaime de Compostela, que deixó 79 muertos y 150 nafraus, qualques d’ells en situación critica encara.

Seguntes as primeras informacions, encara provisionals y aguardando l’informe d’a Policía Chudicial, o tren iba a 192 km/h en o tramo anterior a la curva, encara que i hai constancia en o conteniu d’as caixas negras que s’activó un fren, deixando a velocidat en a curva en 153 km/h. A velocidat maxima permitida yera de 80 km/h.

O maquinista recibió una trucada en o telefono d’interpresa de parte de personal de Renfe, talment un controlador, pa indicar-le o camín que heba de seguir enta Ferrol. Amás pareixe ascuitar-se bell rudio de papels, como si o maquinista estase consultando mapas. D’ista trucada no’n dioron treslau ni o maquinista en a declaración chudicial, ni Renfe.

Tanimientres, contina a polemica por a inexistencia de sistemas de seguridat adequaus a la linia y trens que circulan por ella. En dito tramo, Adif reconoixió que nomás existen balizas y equipos de sinyals d’Asfa analochico, de mas de medio sieglo y desactualizau pa los trens que circulan por a linia. O moderno sistema ERTMS, que no ye operativo en ixe tramo, podría haber evitau a trachedia.

BNG y AEG han reclamau una comisión d’investigación de l’accident en o Parlamento gallego, y o PSOE ha demandau a comparecencia d’a ministra Ana Pastor en o Congreso d’os Diputaus, amás d’a presencia d’os responsables de Renfe y Adif. Entremistanto a Comisión d’Investigación de Fomento contina con a investigación en o puesto de l’accident. En breu podría estar clamaus testigos a declarar en o chudgau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.